Covid 19 Curfew: माजी आमदारांच्या मुलाच्या लग्नात ५० हून अधिक वऱ्हाडी

औरंगाबाद: कोरोनाच्या पार्श्वभूमीवर लग्न समारंभासारख्या गर्दीच्या कार्यक्रमांसाठी उपस्थितांची मर्यादा ठरवून दिलेली आहे. लग्नासाठी २५ वऱ्हाडी मंडळींची २५ जणांची परवानगी देण्यात आलेली आहे. असे असले तरी गारखेडा परिसरातील प्रतिष्ठित नागरिक आणि माजी आमदारांच्या मुला-मुलीच्या विवाहात कोरोनाच्या अनुषंगाने घालून दिलेल्या सर्वच नियमांचा भंग करण्यात आला आहे.

या प्रकरणीत चिकलठाणा पोलिसांनी चितेपिंपळगाव येथील बागडे पाटील लॉन्सच्या मालकासह वधु पित्याविरोधात गुन्हा दाखल केला आहे. इतकेच नव्हे तर लॉन्स मालकाला ५० हजारांचा दंड ठोठावण्यात आला आहे.

या प्रकरणी चित्तेपिंपळगाव परिसरातील बागडे पाटील लॉन्समध्ये मंगळवारी (ता.५) दुपारी गारखेडा भागातील प्रतिष्ठित नागरिक गणेश भारत चौधरी यांच्या मुलीशी पैठणचे माजी आमदार संजय वाघचौरे यांच्या मुलाचा लग्न सोहळा सुरू होता. या लग्न समारंभात २५ पेक्षा जास्त वऱ्हाडींची उपस्थिती होती. याबाबतची माहिती मिळाल्यावरुन चिकलठाणा पोलीस ठाण्याचे सहायक पोलीस निरीक्षक विश्वास पाटील यांनी कर्मचाऱ्यांसह धाव घेतली.

त्यानंतर पोलिसांनी लॉन्स मालक प्रल्हाद कडूबा बागडे आणि आयोजक वधू पिता गणेश चौधरी यांना ताब्यात घेतले. चितेगाव ग्रामपंचायत कोविड-१९ चे समिती सदस्य पांडूरंग सर्जेराव सोनवणे यांच्या तक्रारीवरुन चिकलठाणा पोलीस ठाण्यात आपत्ती व्यवस्थापन अधिनियमानुसार चिकलठाणा पोलीस ठाण्यात गुन्हा दाखल करण्यात आला आहे. तर लॉन्स मालक प्रल्हाद बागडे यांना ५० हजारांचा दंड आणि नोटीस बजावली आहे.