Crime News : चोर तो चोर वर शिरजोर! कैऱ्या तोडू न दिल्याने तरूणावर वार

छत्रपती संभाजीनगर : आंब्‍याच्या कैऱ्या तोडण्यावरुन तरुणावर धारदार वस्तूने वार करुन जखमी केले. हा प्रकार ११ मे रोजी धनमंडीबाग, भाजीमंडी, औरंगपुरा भागात घडला. या प्रकरणी तरुणाने दिलेल्या फिर्यादीवरून एकाविरोधात गुन्हा दाखल झाला असून शेख समीर अब्दूल रशीद (२६, रा.नारायणनगर, जुना बाजार) असे मारहाण करणाऱ्याचे नाव आहे.

यासंदर्भात नितीन सुमीत पंडूरे (२१, रा. धनमंडीबाग) याने फिर्याद दिली. त्यानुसार नितीन याला त्याच्या काकूने फोन करुन सांगितले की, आपल्या आंब्याच्या कैऱ्या तोडण्यासाठी काही मुले आलेली आहेत. त्यावर नितीन हा आंब्याच्या झाडाजवळ गेला असता, तिथे संशयित आरोपी शेख समीर याचा भाचा सुलेमान होता.

सुलेमानसोबतची सर्व मुले गेली, तर नितीन याने सुलेमानला पकडून ठेवले, काही वेळात आरोपी तिथे आला आणि त्याने ‘माझा भाचा सुलेमानला कैऱ्या का तोडू देत नाहीस’ असे म्हणत नितीनच्या ओठावर धारदार वस्तूने वार केल्याचे फिर्यादीत म्हटले आहे. याप्रकरणी दाखल गुन्ह्याचा अधिक तपास उपनिरीक्षक मुक्तेश्वर लाड करत आहेत.