Crime news : अल्पवयीन मुलीवर अत्याचार प्रकरणी तरुणाला कारावास, दंड

परभणी : सेलू शहरातील अल्पवयीन मुलीवर अत्याचार केल्याबद्दल वैभव बाबाराव कदम या आरोपीस विशेष न्यायालयाने गुरुवारी २० वर्षाच्या कारावासाची शिक्षा ठोठावली.सेलूतील एका कुटुंबाच्या घरामध्ये कोणी नसल्याचे पाहून वैभव कदम या तरुणाने प्रवेश केला आणि अल्पवयीन मुलीवर अत्याचार केला, जीवे मारण्याची धमकी दिली.

मुलीच्या आईने सेलू पोलिसांत २२ मार्च २०२२ ला तक्रार दाखल केली. संशयिताविरुद्ध पोस्को कायद्यांतर्गत गुन्हा दाखल झाला. पोलिस निरीक्षक आर.जी.गाडेवाड यांनी कारवाई करीत विशेष न्यायालयात दोषारोपपत्र दाखल केले. विशेष न्यायालयाने संबंधित आरोपीस पोस्को या कायद्यांतर्गत २० वर्षे कारावास, १० हजार रुपये दंड, दंड न भरल्यास सहा महिने कारावास, अन्य कलमान्वये १ वर्ष कारावास, ५ हजार रुपये दंड, दंड न भरल्यास एक वर्ष कारावासाची शिक्षा ठोठावली.

सरकारी अभियोक्ता म्हणून अँड.आनंद गिराम यांनी काम पाहिले. सहाय्यक पोलिस निरीक्षक सानप, उपनिरीक्षक चव्हाण, अंमलदार वंदना आदोडे, अंमलदार गजानन गवळी यांनी तपासात महत्त्वाची भूमिका बजावली.