NMMS शिष्यवृत्ती परीक्षेची तारीख जाहीर

औरंगाबाद : महाराष्ट्र राज्य परीक्षा परिषदेच्या वतीने इयत्ता आठवीसाठी घेण्यात येत असलेल्या राष्ट्रीय आर्थिक दुर्बल घटक विद्यार्थ्यांसाठी शिष्यवृत्ती योजना परीक्षा १९ जून रोजी घेण्यात येणार आहे. याबाबत परीक्षा परीषदेने पत्र जारी केले आहे.

राष्ट्रीय आर्थिक दुर्बल घटक विद्यार्थ्यांसाठी शिष्यवृत्ती योजना परीक्षा दरवर्षी फेब्रुवारीत घेतली जाते. मात्र, करोनामुळे वेळापत्रक कोलमडले होते. चालू शैक्षणिक वर्षातील शिष्यवृत्ती परीक्षा फेब्रुवारीमध्ये घेण्याची घोषणा करण्यात आली होती. डिसेंबरमध्ये विद्यार्थ्यांचे ऑनलाइन अर्ज स्वीकारण्यास सुरुवात केली होती. त्यानंतर जानेवारीमध्ये पुन्हा मुदत वाढवून देण्यात आली होती. परीक्षा होणार की नाही, होणार असल्यास ती कधी होणार याबाबत विद्यार्थी, पालक, शिक्षक यांच्यात संभ्रमावस्था निर्माण झाली होती.

मात्र, अखेर परीक्षा परीषदेने १९ जूनला महाराष्ट्रातील विविध केंद्रावर शिक्षणाधिकारी (माध्यमिक) किंवा शिक्षण निरिक्षक बृहन्मुबई यांचे मार्फत राज्यभर परीक्षा घेण्यासाठी वेळापत्रक जाहीर केले आहे. यासाठी राज्यभरातून सुमारे सात लाख विद्यार्थ्यांनी या परीक्षेसाठी नोंदणी केलेली आहे. ऑनलाईन परीक्षेसाठी नियमित आवेदनपत्रे भरण्यासाठी ६ ते २६ एप्रिलपर्यत मुदत आहे. विलंब आवेदनपत्रासाठी २७ एप्रिल ते एक मेपर्यतं अवधी असेल, तर अतिविलंबासह आवेदनपत्र भरण्यासाठी २ ते ६ मेदरम्यान मुदत दिली आहे.

दृष्टीक्षेपात...

• विद्यार्थ्यांना दोन्ही विषयात मिळून पात्रतेसाठी ४० टक्के तर एससी, एसटी व दिव्यांग विद्यार्थ्यांना पात्रतेसाठी ३२ टक्के गुण मिळणे आवश्यक आहे.

• अखिल भारतीय पातळीवर शिष्यवृत्तीची संख्या एक लाख आहे. महाराष्ट्रासाठी ११ हजार ६८२ इतका कोटा निश्चित केला आहे.

• परीक्षेचा निकाल ऑगस्टमध्ये जाहीर केला जाणार असून पात्र विद्यार्थ्यांना नववी ते बारावीपर्यंत दरमहा एक हजार (वार्षिक बारा हजार) रुपये शिष्यवृत्ती दिली जाईल.

वेळापत्रक

१९ जून ः १०.३० ते १२ - बौद्धिक क्षमता चाचणी

दुपारी १.३० ते ३ - शालेय क्षमता चाचणी