Sambhaji Nagar News : डॉ. बाबासाहेब आंबेडकर मराठवाडा विद्यापीठ नामविस्तार दिनानिमित्त शहरात विविध कार्यक्रम

छत्रपती संभाजीनगर : डॉ. बाबासाहेब आंबेडकर मराठवाडा विद्यापीठ नामविस्तार दिनानिमित्त शहरात विविध पक्ष आणि सामाजिक संघटनांतर्फे रविवारी (ता. १४) भरगच्च कार्यक्रम आयोजित करण्यात आले आहेत. रिपाइं (आठवले गट) रिपब्लिकन पार्टी ऑफ इंडिया (आठवले) तर्फे सायंकाळी सहा वाजता डॉ. बाबासाहेब आंबेडकर कला व वाणिज्य महाविद्यालयाच्या मैदानावर पक्षाचे राष्ट्रीय अध्यक्ष तथा केंद्रीय सामाजिक न्याय राज्यमंत्री रामदास आठवले यांची सभा होणार आहे.

आंबेडकरवादी संघर्ष समिती

आंबेडकरवादी संघर्ष समितीतर्फे विद्यापीठ गेट समोरील शहीद स्मारकाला अभिवादन करण्यात येणार आहे. या कार्यक्रमाला उपस्थित राहावे, असे आवाहन समितीचे अध्यक्ष श्रावणदादा गायकवाड यांनी केले.

भारतीय दलित पँथर

भारतीय दलित पँथरतर्फे नामांतर शहीद स्तंभाला अभिवादन करण्यात येणार आहे. सकाळी १० वाजता विद्यापीठ गेटजवळ हा कार्यक्रम होणार आहे. पँथर नेते ॲड. रमेशभाई खंडागळे यांची प्रमुख उपस्थिती राहील. त्याचप्रमाणे प्रा. समाधान धांडे, रतनभाई खंडागळे, सुरेश खाडवे, गणेश चव्हाण, नीतेश तांगडे, कडुबा म्हस्के, किरण आरके आदी उपस्थित राहणार आहे.

धम्मरत्न मित्रमंडळ

राजमुद्रा चौक, टीव्ही सेंटर हडको येथे नामांतरातील शहीदांना अभिवादन करण्यात येणार आहे. सकाळी नऊ वाजता हा कार्यक्रम होणार आहे.

कीर्ती गृहनिर्माण संस्था

कीर्ती गृहनिर्माण संस्था, आझाद चौक सिडको एन-८ येथील लुंबिनी बुद्धविहारात सकाळी १०.३० वाजता अभिवादन कार्यक्रम घेणार आहे.

वंचित बहुजन आघाडी

वंचित बहुजन आघाडीतर्फे सकाळी ११.३० वाजता शहीद स्मारक व डॉ. बाबासाहेब आंबेडकर यांना अभिवादन करण्यात येणार आहे. उपस्थितीचे आवाहन रूपचंद गाडेकर यांनी केले.

भारतीय दलित कोब्रा

भारतीय दलित कोब्रा संघटनेतर्फे सकाळी अभिवादन रॅली व अन्नदान असे कार्यक्रम होतील. त्यानंतर सायंकाळी पीईएस महाविद्यालयाच्या मैदानावर सायंकाळी ६.३० संघटनेचे प्रमुख विवेक चव्हाण यांची जाहीर सभा होणार आहे. यावेळी मराठवाडा अध्यक्ष अशोक दादा बोर्डे यांची प्रमुख उपस्थिती राहील.