जिल्ह्याला दुष्काळातून बाहेर काढण्यासाठी शासन कटिबद्ध

पान एक अँकर (दुष्काळ स्थिती ः आमदार मुलाखत) ....... जिल्ह्याला दुष्काळातून बाहेर काढण्यासाठी शासन कटिबद्ध दुष्काळजन्य स्थितीच्या पार्श्वभूमीवर आमदार राणाजगजितसिंह पाटील यांचे प्रतिपादन सकाळ वृत्तसेवा ः धाराशिव, ता. १३ ः : ‘‘जिल्ह्यातील दुष्काळी आणि पीक नुकसानीची परिस्थिती अत्यंत गंभीर आहे. या संकटाच्या काळात शासन आणि प्रशासन पूर्ण ताकदीने शेतकऱ्यांच्या पाठीशी उभे आहे. कृषी विद्यापीठ आणि आयआयटीच्या टीमने तयार केलेल्या अहवालानुसार जिल्ह्यात ३३ टक्क्यांपेक्षा जास्त नुकसान झाले असून, लवकरच पंचनामे करून एनडीआरएफ व एसडीआरएफमधून शेतकऱ्यांना भरीव मदत आणि पीकविमा मिळवून देण्यासाठी प्रयत्न सुरू आहेत’’, अशी ग्वाही आमदार राणाजगजितसिंह पाटील यांनी एका विशेष मुलाखतीत दिली. विरोधकांनी या संकटाचे राजकारण न करता सकारात्मक भूमिका घ्यावी; त्यांनी मांडलेल्या वास्तविक प्रश्नांची दखल सरकार नक्कीच घेईल, असे आवाहनही पाटील यांनी केले. ठळक चौकटी पीक नुकसान भरपाई आणि पंचनामे आमदार पाटील म्हणाले, की पीक नुकसानीच्या पार्श्वभूमीवर कृषी विद्यापीठ आणि आयआयटीच्या संयुक्त पथकाने तयार केलेला अहवाल जिल्हाधिकाऱ्यांना सादर करण्यात येत आहे. ३३ टक्क्यांपेक्षा अधिक नुकसान झाल्याचे स्पष्ट झाले असून, राज्य मंत्रिमंडळाच्या बैठकीत यावर चर्चा झाली आहे. लवकरच यासंबंधीच्या लेखी सूचना प्रशासनाला मिळतील. त्यानंतर एनडीआरएफ आणि एसडीआरएफच्या निकषानुसार मदतवाटप सुरू होईल. तसेच, उडीद-मुगाची काढणी सुरू होऊनही ई-पीक पाहणी रखडल्यामुळे मदत व विम्यात अडचणी येत असल्याबाबत विचारले असता, या कामाचा तत्काळ आढावा घेऊन पीक पाहणी गतिमान करण्याच्या सूचना प्रशासनाला दिल्या जातील, असे त्यांनी स्पष्ट केले. पाणीटंचाई व कृष्णा-मराठवाडा सिंचन प्रकल्प जिल्ह्यात पाणीसाठा अत्यंत कमी असल्याने प्रत्येक तालुक्याचा प्रारूप आराखडा तयार करण्यात आला आहे. तसेच कृष्णा-मराठवाडा प्रकल्पाच्या टप्पा क्र. २ अंतर्गत घाटणे बॅरेज ते रामदरा साठवण तलावापर्यंतचे काम पूर्णत्वाकडे आहे. उजनी धरण भरले असून, तेथून पाणी आणून सीना नदी पात्रात सोडले जाईल. त्यानंतर घाटणे बॅरेज भरून गरजेनुसार पांगरदरवाडी, सिंदफळ आणि रामदरा या साठवण तलावांमध्ये पाणी उचलून सोडण्याचे नियोजन आहे, असेही पाटील म्हणाले. वीज मागणी वाढल्याने अखंडित वीज देणे कठीण जात असले तरी पिण्याचे पाणी राखीव ठेवण्यास प्राधान्य दिले आहे. पाण्याचा अवैध उपसा रोखण्यासाठी गस्ती पथकांना कठोर अंमलबजावणीचे आदेश दिले आहेत, असे त्यांनी सांगितले. जिल्ह्यात संभाव्य चाराटंचाई लक्षात घेऊन तालुकास्तरावर नियोजन सुरू आहे. तुळजापूर तालुक्याची बैठक पार पडली असून गरजेनुसार चारा डेपो सुरू करण्याचे प्रयत्न सुरू आहेत. त्याचबरोबर, ग्रामीण भागातील मजुरांच्या हाताला काम मिळण्यासाठी ''रोजगार हमी योजने''तून प्रत्येक गावात विहीर, तलाव खोलीकरण व रुंदीकरणाची कामे हाती घेतली जात आहेत, अशी माहिती पाटील यांनी दिली. ‘परतीचा पाऊस चांगला पडावा हीच ईश्वरचरणी प्रार्थना आहे. पाऊस पाडून पाणी जमिनीत मुरवणे हाच शाश्वत मार्ग आहे. मात्र, पावसाअभावी उद्भवलेल्या या मोठ्या संकटाशी सर्वांना धैर्याने लढावे लागेल. जिल्ह्याला कायमस्वरूपी दुष्काळमुक्त करण्यासाठी कृष्णा-मराठवाडा प्रकल्प प्रभावीपणे पूर्ण करणे आणि पश्चिम महाराष्ट्रातील हक्काचे पाणी जिल्ह्यात आणणे यावर आमचा भर आहे’, असा विश्वास पाटील यांनी व्यक्त केला. ...... फोटो ः राणाजगजितसिंह पाटील फोटो क्रमांक ः OSM26B06977