नापिकी व कर्जबाजारीपणामुळे शेतकऱ्याची आत्महत्या; धावत्या रेल्वेसमोर उडी मारून जीवन संपवले

करमाड : सलग नशिबी आलेली नापिकी व यातून वाढत जाणाऱ्या कर्जाला कंटाळून मागील काही दिवसांपासून मानसिक स्थिती ढासळलेल्या 40 वर्षीय शेतकऱ्याने शेवटी धावत्या रेल्वेसमोर उडी मारुन आपले जीवन संपवले.

सटाणा (ता. छत्रपती संभाजीनगर) शिवारातील फकीरवाडी जिल्हा परिषद शाळेलगतच्या रेल्वे रुळावर शुक्रवारी (ता. तीन) मध्यरात्रीनंतर ही घटना घडली. भाऊसाहेब दामू ठोंबरे (39, रा. गाढेजळगाव ता. छत्रपती संभाजीनगर) असे या घटनेत मृत पावलेल्या अल्पभूधारक शेतकऱ्याचे नाव आहे. श्री. ठोंबरे यांची गाढेजळगाव शिवारात दोन एकर कोरडवाहू शेती आहे.

मागील काही वर्षापासून पावसाच्या लहरीपणामुळे एकीकडे शेती तोट्यात जात होती तर घेतलेले कर्ज मात्र वाढत चालले होते. त्यांच्याकडे स्टेट बँक ऑफ इंडिया व गावस्तरावरील सेवा संस्थेचे कर्ज असल्याचे त्यांच्या कुटुंबियांकडून सांगण्यात आले. यातूनच मागील काही दिवसांपासून त्यांची मानसिक स्थिती बरोबर नव्हती.

शुक्रवारी रात्री उशिरापर्यंत ते घरी आले नव्हते. सगळीकडे शोधाशोध सुरू असताना शनिवारी सकाळी काही जणांच्या ही बाब लक्षात आली. त्यानंतर घाटी रुग्णालयात शवविच्छेदन केल्यानंतर दुपारी साडेबाराच्या सुमारास गाढेजळगाव येथे शोकाकुल वातावरणात अंत्यसंस्कार करण्यात आले.

श्री. ठोंबरे यांच्या पश्चात आई, एक भाऊ, एक मुलगा, एक मुलगी असा परिवार आहे. पुढील तपास करमाड पोलीस ठाण्याचे सहायक पोलीस निरीक्षक प्रताप नवघरे यांच्या मार्गदर्शनाखाली पीएसआय ढाकणे करीत आहेत.