औरंगाबाद : लस न घेता रस्त्यावर याल तर ५०० रुपये दंड

औरंगाबाद : कोरोना प्रतिबंधक लसीकरणाची गती वाढविण्यासाठी प्रशासनाचे प्रयत्न सुरूच आहेत. आता लसीचा पहिला डोस न घेता व दुसरा डोस घेण्यास टाळाटाळ करणाऱ्यांना ५०० रुपये दंड लावला जाणार आहे. जिल्हाधिकारी सुनील चव्हाण यांच्या निर्देशानुसार महापालिकेचे प्रशासक आस्तिककुमार पांडेय यांनी हे आदेश काढले आहेत. बुधवारपासून (ता. १५) महापालिकेच्या नागरिक मित्र पथकामार्फत कारवाई केली जाणार आहे.

केंद्रासोबतच राज्य सरकारनेही शंभर टक्के लसीकरण करण्याच्या सूचना प्रशासनाला केल्या आहेत. आपत्ती व्यवस्थापन कायद्याअंतर्गत कोरोना प्रतिबंधक लसीचा एकही डोस न घेता रस्त्यांवर फिरणाऱ्या, तसेच लसीचा दुसरा डोस घेण्यास टाळाटाळ करणाऱ्यांना दंड करण्याचा निर्णय जिल्हाधिकारी सुनील चव्हाण यांनी जाहीर केला आहे. शहरात बुधवारपासून या आदेशाची अंमलबजावणी होईल. सोमवारी महापालिका प्रशासकांनी यासंदर्भात आदेश काढले. कारवाईसाठी पुन्हा एकदा नागरिक मित्र पथके कार्यान्वित केली जाणार आहेत.

५०० रुपयांचा भरावा लागणार दंड

कोरोना प्रतिबंधक लसीचा पहिला डोस न घेणारे व दुसरा डोस घेण्यास टाळाटाळ करणाऱ्यांचा शोध नागरिक मित्र पथके घेणार आहेत. अशा नागरिकांना तब्बल ५०० रुपये दंड लावला जाणार आहेत. यापूर्वी मास्क न वापरणाऱ्यांना ५०० रुपये दंड लावला जात होता.

एकही डोस न घेतलेले दोन लाख ११ हजार

महापालिकेला नागरिकांच्या लसीकरणासाठी १० लाख ५५ हजार ६०० एवढे उद्दिष्ट देण्यात आले आहे. त्यातील आठ लाख ४४ हजार जणांनी पहिला डोस घेतलेला आहे तर एकही डोस न घेतलेले दोन लाख ११ हजार नागरिक आहेत. त्यांचा शोध प्रशासनाला घ्याला लागणार आहे. तसेच दुसऱ्या डोसची मुदत संपल्यानंतरही ६७ हजार नागरिकांनी अद्याप दुसरा डोस घेतलेला नाही.