Crime News: नात्याला काळीमा फासणारी घटना; रागाच्या भरात पत्नीची दोरीने गळा आवळून हत्या; नातेवाइकांचा आरोप

हिंगोली: भांडणानंतर रागाच्या भरात पत्नीच्या गळ्यावर जोराची लाथ मारली. त्यानंतर दोरीने गळा आवळून तिचा खून केल्याचा आरोप तिच्या माहेरकडील नातेवाइकांनी केला. तालुक्यातील डिग्रस कऱ्हाळे येथे रविवारी (ता. सात) ही घटना उघडकीस आली आहे. योगिता संतोष कऱ्हाळे (वय २८) असे मृताचे नाव आहे.

पोलिसांनी दिलेली माहिती अशी; वसमत तालुक्यातील सोन्ना येथील योगिता यांचा विवाह दहा वर्षांपूर्वी डिग्रस कऱ्हाळे येथील संतोष बळिराम कऱ्हाळे याच्यासोबत झाला होता. त्यांना एक मुलगा व एक मुलगी आहे.

काही दिवसांपासून त्यांच्यात किरकोळ कारणावरून वाद होत होता. घटनेच्या दिवशी संतोष व त्याची पत्नी योगिता दोघेच घरी होते. संतोषचे वडील व आई घरी नव्हते. मध्यरात्री संतोष आणि योगिता यांच्यात शाब्दिक वाद झाला.

योगिताच्या माहेरकडील नातेवाइकांनी आरोप केला की, या वादातून संतोषने योगिता यांच्या गळ्यावर लाथ मारली. त्यामुळे त्या जमिनीवर कोसळल्या. त्यानंतर त्याने दोरीने योगिता यांचा गळा आवळून खून केला. रात्रभर तो मृतदेहाजवळच होता.

आज सकाळी त्याने सोन्ना येथे योगिता यांच्या माहेरी संपर्क साधून तिचा मृत्यू झाल्याची माहिती दिली, असेही तिच्या नातेवाइकांकडून सांगण्यात आले.

पोलिस निरीक्षक शिवाजी गुरमे, उपनिरीक्षक मगन पवार, जमादार विक्की कुंदनानी, शेख महमद, रामराव चिभडे, आकाश पंडितकर यांच्या पथकाने घटनास्थळी भेट दिली. या प्रकरणी उशिरापर्यंत गुन्हा नोंद झालेला नव्हता.