घनसावंगी : समृद्धी कारखान्याचा पेटला बॉयलर

घनसावंगी : देवीदहेगाव येथील समृद्धी साखर कारखान्याच्या बॉयलर अग्नी प्रदीपन समारंभ शुक्रवारी (ता.२२) अध्यक्ष सतीश घाटगे पाटील यांच्या प्रमुख उपस्थितीत झाला. यानिमित्त श्री.घाटगे पाटील म्हणाले, की समृद्धी साखर कारखान्याच्या सभासदांचा साडेसहा लाख टन ऊस उपलब्ध आहे, कारखाना साडेपाच लाख टन गाळप करील. एक लाख टनाच्या उसासंदर्भात इतर कारखान्यांशी गाळपासंबंधी चर्चा सुरू आहे. संपूर्ण ऊस गाळप करून कारखाना पाऊस पडेपर्यंत चालवण्यात येईल.

कार्यक्रमास कारखान्याचे उपाध्यक्ष महेंद्र मेठी, वैशालीताई घाटगे पाटील, रिंकूताई मेठी, संचालक दिलीप फलके, अभिजित सुंदरराव उढाण, मधुकर जगदाळे, अशोक बोबडे, दिलीप गुजर, दत्ता वाघमारे आदी उपस्थित होते.

सतीश घाटगे पाटील म्हणाले की मागील वर्षी कारखान्याने पाच लाख २२ हजार ५०० टन गाळप करून ५ लाख १४ हजार ७०० पोती उत्पादित केली असून वीजनिर्मितीतून कारखान्यास १७ कोटी रुपयांचे उत्पन्न झाले आहे. सरासरी उतारा ९.८५ आला. कारखान्याने ऊस उत्पादकांना एफआरपी पेक्षा १०० रुपये जास्तीचे अदा केले आहेत. परिसरातील दुसऱ्या कारखान्यांपेक्षा १०० ते १५० रुपये कमी भावाचे कारण म्हणजे उसाची सरासरी रिकव्हरी आहे.

कारखान्याकडून यंदा रिकव्हरीसाठी नियोजन केले आहे. साखर उतारा जास्त कसा येईल जेणेकरून परिसरातील इतर कारखान्यांचा दर समृद्धीच्या शेतकऱ्यांना अदा करता येईल. अतिरिक्त पावसामुळे जायकवाडी धरण १०० टक्के भरले आहे. गोदावरी नदीवरील सर्व बंधारे, छोटी मोठी धरणे १०० टक्के भरली असल्यामुळे उसाचे क्षेत्र वाढणार असून कारखान्यात ८०० टन प्रति दिन विस्तारित करण्याचे काम सुरु करण्यात आले आहे.

फेब्रुवारी व मार्च महिन्यात काम पूर्ण होऊन पुढील वर्षी कारखाना ३ हजार ८०० टन प्रति दिन क्षमतेने चालेल. त्यामुळे पुढील वर्षी साडे सात लाख टन ऊस गाळप होईल. तसेच दिवाळीनिमित्त कर्मचाऱ्यांना एक महिन्याचा पगार बोनस म्हणून देण्यात येणार आहे.

कार्यक्रमास रंजीतराव उढाण, विकास शिंदे, व्यवस्थापक श्री. माधनकर, मुख्य शेतकी अधिकारी अमोल तौर, प्रदीप घाटगे पाटील, श्री. सिंग साहेब, श्री. माथूर यांच्यासह अधिकारी व कर्मचारी तसेच भागातील शेतकरी, तोड वाहतूक, ठेकेदार मोठ्या संख्येने उपस्थित होते.