Aurangabad|पैठणमध्ये गाव लुटीचा प्रयत्न फसला,सोन्याचे दागिने चोरले

पाचोड (जि.औरंगाबाद) : अवघे गाव गाढ झोपेत असताना चोरट्यांनी अनेक घरांचे बाहेरहून कडी-कोयंडे लावून नियोजनबद्ध गाव लुटीचे नियोजन आखले. मात्र चोरटे केवळ एकाच घरात धाडसी जबरी चोरी करुन पावणेदोन लाखांच्या रोकडसह साडेसात लाख रुपये किंमतीचे सोन्याचे दागिने चोरून नेण्यात यशस्वी झाल्याची घटना वडजी (ता.पैठण) येथे शनिवारी (ता.११) पहाटे दोन वाजेच्या सुमारास घडली. अधिक माहीती अशी, वडजी (ता.पैठण) (Paithan) हे अडीचशे उंबऱ्याचे गाव अलीकडे मोसंबी, भाजीपाला व डाळिंबाच्या बागांमुळे सधन झाले असुन गावांत अनेक छोटे-मोठे कापसाचे व्यापारी उदयाला आले. गावात दररोज मोठ्या प्रमाणावर उलाढाल होत असल्याचे लक्षात घेऊन अज्ञात चोरट्यांनी शुक्रवारी (ता.१०) व्यवहारावर पाळत ठेवून गाव लुटीचेच नियोजन आखून शनिवारी (ता.११) पहाटे दीड-दोन वाजेच्या सुमारास चोरट्यांनी थेरगाव-विहामांडवा रस्त्यावरील वडजी गावाला (looting attempt of village in paithan failed aurangabad news) लक्ष्य केले. मात्र रोख रकमेसह साडेसात लाखांच्या ऐवजावर त्यांना समाधान मानावे लागले. (Aurangabad Crime)

अज्ञात चोरट्यांनी वडजी गावात प्रवेश करून ग्रामस्थ गाढ झोपेत असल्याचे पाहुन मुख्य रस्त्यावरील महत्त्वाच्या पंधरा वीस घरांच्या बाहेरुन कड्या लावून ग्रामस्थांना घरांत कोंडून टाकत वाघमारे कुटुंबियांना सर्वप्रथम लक्ष्य केले. मात्र मोबाईलमुळे चोरट्यांचे गावलुटीचा डाव उधळला गेला. वडजी येथील सखाराम दामोधर वाघमारे हे दिवसभराचे काम आटोपून त्यांच्या पत्नीसह अशोक व विकास या मुलासोबत नवीन बांधलेल्या घरांत झोपी गेले. ते गाढ झोपेत असतांना चोरट्यांनी घरा समोरील दिवे बंद करून चॅनेल गेटमधून आत प्रवेश मिळविला व सखाराम व त्यांच्या मुलाच्या खोल्याचे बाहेरून कोयंडे लावून सर्व लाईट बंद करून एकेक खोलीतील सामानाची धुडाळणी सुरू केली. सर्वप्रथम चोरट्यांनी लोखंडी पेट्या घरामागील कापसाच्या शेतात नेऊन त्यातील साहित्याची तपासणी केली. यात ठेवलेले सर्व कुटुंबियाचे, सासरी नांदावयास गेलेल्या मुलींचे सोन्याचे गंठण, पोती, मणी, कर्णफुले, झुंबर, एकदाणी आदी साडेबारा तोळ्याचे दागिने तर पन्नास हजारावर चांदीचे दागिने, रोख पावणेदोन लाख रुपये चोरट्यानी काढुन घेतले. घरांत आणखी काही असेन म्हणुन पुन्हा ते घराची झडती घेत असताना सखाराम यांना खडखड आवाज ऐकू आला असता ते झोपेतून उठले व त्यांनी दुसऱ्या खोलीत जाण्याचा प्रयत्न केला तर त्यांना बाहेरून दरवाजा बंद केल्याचे दिसून आले. लाईटही बंद असल्याने पाहुन त्यांना चोरट्यांचा संशय आला. त्यांनी दरवाजाला कान लावून कानोसा घेतला असता चोरटे घराची धुंडाळणी घेत असल्याचे त्यांच्या लक्षात आले.

त्यांनी उशाला ठेवलेला आपला मोबाईल घेऊन शेजाऱ्यांशी संपर्क केला. मात्र त्यांचे दरवाजाचे बाहेरून कोयंडे लावल्याने ते येऊ शकले नाही. त्यानंतर गावांत अन्य लोकांना मोबाईल केला. त्यातही वीस -पंचवीस जणाचे बाहेरून कड्या लावल्याने ते उठले. परंतु मदतीसाठी येऊ शकले नाही. सखाराम यांनी आपल्याकडील बॅटरी चमकावली असता चोरट्यांनी घरांतून कापसाच्या पिकांत पळ काढला. चोरटे आल्याचे एकमेकांना फोनवरून कल्पना दिल्याने अवघे गाव झोपेतुन जागे झाले. सर्वानी दरवाजे कड्या उघडून वाघमारे कुटुंबियाच्या घराकडे गर्दी केली. चोरट्यांनी मिळालेल्या वाघमारेंच्या ऐवजावरच समाधान मानुन घटनास्थळाहून शेताच्या दिशेन पोबारा केला. सरपंच भाऊसाहेब गोजरे, पोलिस पाटील विठ्ठल झिणे, महेश झरकर, कैलास भांड आदीनी या घटनेची पाचोड पोलिसांना माहिती दिली. ही माहीती मिळताच सहायक पोलिस निरीक्षक गणेश सुरवसे यानी सहकाऱ्यांसमवेत घटनास्थळी धाव घेऊन पाहणी केली. व औरंगाबादहुन श्वान व अंगुलामुद्रा तज्ञाच्या पथकाला पाचारण केले. त्यानंतर पैठणचे उपविभागीय पोलीस अधिकारी डॉ.विशाल नेहुल यांनी घटनास्थळी भेट देऊन पाहणी केली. श्वानपथकाने 'माघ' शोधण्याच्या प्रयत्न केला. मात्र गावालगतच्या नदीपर्यंत श्वान जाऊन तेथेच घुटमळले. कापसाच्या पिकांत अस्ताव्यस्त पडलेल्या लोखंडी पेट्या, कपडे, सखाराम वाघमारे यांचे घरातील अन्य साहित्य सापडून आले. एकंदरीत या घटनेमुळे परिसरात खळबळ उडाली असून चोरट्यांची दहशत पसरली आहे. सखाराम वाघमारे यांच्या तक्रारीवरुन अज्ञात चोरट्याविरूध्द पाचोड पोलिस ठाण्यात गुन्हा दाखल करण्यात आला असून पुढील तपास सहायक पोलिस निरीक्षक गणेश सुरवसे यांच्या मार्गदर्शनाखाली पोलिस कर्मचारी करीत आहेत. सरपंच भाऊसाहेब गोजरे यांनी पोलीसांची रात्रीला गस्त सुरु करण्याची मागणी केली आहे.