Sambhaji Nagar : शहराच्या उद्यानांतील गेम झोनचे होणार खासगीकरण

छत्रपती संभाजीनगर : शहरात एकीकडे ‘आम्हाला खेळू द्या’ अभियानाची महापालिकेतर्फे तयारी सुरू असताना आता उद्यानांतील ‘गेम झोन’चे खासगीकरण करण्यासाठी महापालिकेने इच्छुकांकडून प्रस्ताव मागविले आहेत. त्यामुळे उद्यानात मुलांना घसरगुंडी, झोका, सिसॉ खेळण्यासाठी पैसे मोजावे लागण्याची शक्यता आहे.

महापालिकेतर्फे शहराच्या विविध भागातील उद्यानांचा विकास केला जात आहे. त्यानुसार सिडको एन-८ येथील बोटॅनिकल गार्डन, नेहरू उद्यान, सिडको एन-१२ येथील स्वामी विवेकानंद उद्यान, रोज गार्डन, डॉ. सलीम अली उद्यान, हर्सूल तलावाच्या पायथ्याशी असलेले स्मृतिवन उद्यान विकसित केले जाणार आहे. सिद्धार्थ उद्यान आणि बोटॅनिकल गार्डनमध्ये मिनी ट्रेन सुरू करण्यात आली आहे. या दोन्ही ठिकाणच्या मिनी ट्रेन एजन्सीच्या माध्यमातून चालवली जात आहे.

त्या बदल्यात महापालिकेला व्यवसायाच्या २५ टक्के रॉयल्टी मिळते. त्यातून महापालिकेला चांगले उत्पन्न मिळत आहे. त्यानंतर आता उद्यानातील ‘गेम झोन’चे खासगीकरण करण्याचा निर्णय महापालिका प्रशासनाने घेतला आहे. त्यासाठी डॉ. सलीम अली उद्यान, सिद्धार्थ उद्यान, स्वामी विवेकानंद उद्यान आणि स्मृतिवन उद्यान हर्सूल या चार उद्यानांची निवड करण्यात आली आहे. या उद्यानांमध्ये ‘गेम झोन’ चालवू इच्छिणाऱ्या एजन्सींनी प्रस्ताव सादर करावेत, असे आवाहन करण्यात आले आहे.

एकीकडे चला खेळूया; दुसरीकडे खेळू नका

पात्र ठरणाऱ्या एजन्सीला पाच वर्षांसाठी ‘गेम झोन’ चालवण्यासाठी दिले जाणार आहेत. प्रस्ताव दाखल करण्याची मुदत १६ जानेवारी २०२४ पर्यंत आहे. महापालिका एकीकडे शहरातील खुल्या जागा, मैदाने विकसित करून मुलांना मैदानाकडे आणण्याचा प्रयत्न करीत आहे तर दुसरीकडे आता उद्यानातील मुलांचे खेळणे खासगीकरणामुळे महागण्याची शक्यता व्यक्त केली जात आहे.