Jalna : वकील पतीचा पत्नीकडून खून

जालना : शहरातील अर्चनानगर येथील ॲड. किरण लोखंडे (वय २८) यांचा त्यांच्या पत्नीने खून केल्याचे पुढे आले आहे. दरम्यान, तालुका पोलिसांनी संशयित मनिषा लोखंडे (वय २१) व तिचा साथीदार गणेश मिठू आगलावे (वय २३, ह.मु. जालना) या दोघांना अटक करण्यात आली आहे, या दोघांना बुधवारी (ता.सात) न्यायालयाने सात दिवसांची पोलिस कोठडी सुनावली आहे.

शहरातील अर्चनानगर येथे ता. एक सप्टेंबर रोजी रात्री नऊ वाजेच्या सुमारास गॅस गळती होऊन स्फोट झाल्याचे मनिषा लोखंडे हिने पोलिसांना कळविले होते. यात ॲड. किरण लोखंडे यांचा मृतदेह पूर्णतः जळाला होता. मात्र, पोलिसांना येथे पाहणी केल्यानंतर घटनेबाबत संशय आला होता. त्यानुसार पोलिसांनी तपास करत असताना या घटनेच्या दोन दिवसांपूर्वीचे या भागातील सीटीटीव्ही फुटेज मिळविले. या फुटेजमध्ये मनिषा लोखंडे व तिचा साथीदार गणेश आगलावे मध्यरात्रीनंतर ये-जा करताना दिसून आल्याचे पोलिसांकडून सांगण्यात आले. शिवाय चौकशी दरम्यान ते उडवाउडवीचे उत्तरेही देत होते.

प्राथमिक चौकशी केल्यानंतर या दोघांना मंगळवारी (ता.सहा) रात्री तालुका जालना पोलिसांनी अटक केली. या दोघांना बुधवारी (ता.सात) न्यायालयात हजर करण्यात आले. यावेळी न्यायालयाने या दोघांनाही सात दिवसांची पोलिस कोठडी सुनावल्याचे तपास अधिकारी सहायक पोलिस निरीक्षक संभाजी वडते यांनी सांगितले आहे. या प्रकरणाचा अधिक तपास पोलिस करत आहेत.

तीन महिन्यांपूर्वी विवाह

तीन महिन्यांपूर्वी ॲड. किरण लोखंडे यांचे मनिषा सोबत लग्न झाले होते. अशात ता. एक सप्टेंबर रोजी गॅसचा स्फोट होऊन ॲड. लोखंडे यांचा मृतदेह पूर्णतः जळाला. त्यामुळे मुद्मामहून गॅस गळती केली होती काय, नंतर आग कशी लावली, या दोन्ही संशयितांचे एकमेकांच्या संपर्कात किती दिवसांपासून होते, खून करण्याचे कारण काय होते अशा अनेक प्रश्नांची उत्तरे पोलिस शोधत आहेत.