Nylon Manja : नायलॉन मांजामुळे दुचाकीस्वार जखमी, १७ टाके पडले

छत्रपती संभाजीनगर : चंपा चौक परिसरात दुचाकीस्वारासमोर अचानक पतंगाचा मांजा आल्याने तरुणाच्या डोळ्याखालच्या भागापासून कानापर्यंतचा भाग अक्षरशः कापला गेला. मोहम्मद इमाद (वय २७, रा. नंदनवन कॉलनी) असे या जखमीचे नाव आहे..या दुर्घटनेत त्यांचा डोळा थोडक्यात वाचला असून, तब्बल १७ टाके पडले आहेत. ही घटना सोमवारी सायंकाळी साडेचारला घडली. दरम्यान, या घटनेत इतर सहा जणांनाही दुखापत झाली. यापैकी एकाचा कान कापला गेला. नंदनवन कॉलनी येथील नातेवाईक बिलाल काझी यांच्यासह मोहम्मद इमाद हे दुचाकीवरून जात होते. मोहम्मद इमाद दुचाकी चालवित होते. बिलाल काझी हे मागे बसले होते. साडेचारच्या सुमारास रोशनगेट ते चंपा चौक रस्त्यावरून ते जात असताना अचानक त्यांच्यासमोर मांजा आला..त्यांनी मांजा हाताने दूर सारेपर्यंत क्षणात त्यांच्या नाकाचा वरील भाग आणि उजव्या डोळ्याखालील भागापासून कानापर्यंतचा भाग कापला गेला. त्यामुळे मोठा रक्तस्राव सुरू झाला. त्यांनी उपचारासाठी रिक्षातून घाटी रुग्णालय गाठले. घाटीत दाखल झाल्यावर त्यांच्यावर उपचार करण्यात आले. त्यांच्या डोळ्याखालील भागात १७ टाके पडले..रुग्णावर उपचार पूर्ण झाल्याने त्यांना भरती करण्याची गरज पडली नाही, असे वैद्यकीय अधीक्षक कार्यालयाकडून सांगण्यात आले. थोडक्यात जीव बचावल्याची भावना त्यांनी व्यक्त केली. या घटनेत मोहम्मद यांच्या मागून येणाऱ्या अन्य एका दुचाकीचालकाचा कान कापला गेला. त्यांनाही अन्य रिक्षातून उपचारासाठी नेण्यात आले. त्यांनी खासगी रुग्णालय गाठून उपचार घेतले. मात्र, त्यांचा तपशील कळू शकला नाही. आजूबाजूच्या इतर पाच लोकांनाही दुखापती झाल्याने त्यांनी प्रथमोपचार घेतल्याचे प्रत्यक्षदर्शींनी ‘सकाळ’ला सांगितले..गेल्या आठवड्यात दोघांचा चिरला गळाशहानूरमियाँ दर्गा रस्त्यावरून जवाहरनगरकडे दुचाकीवर येत असताना शनिवारी (ता. २१) सकाळी पांडुरंग कांतीलाल पाटकुले (वय ३०, रा. कैलासनगर, गल्ली नंबर २ पूर्व) यांचा गळा नायलॉन मांजाने कापला गेला. मानेपासून ते गळ्यापर्यंत तब्बल दहा सेंटिमीटर लांब आणि खोलपर्यंत झालेल्या जखमेत थोडक्यात गळ्याच्या नलिका बचावल्या. तसेच हर्सूल येथेही एका दुचाकीस्वार तरुणाचा गळा चिरल्याची घटना घडली होती..बिडकीनला दोघांवर गुन्हाबिडकीन : नायलॉन मांजाची विक्री करणाऱ्या बिडकीन येथील दोन दुकानदारांवर सोमवारी सायंकाळच्या सुमारास बिडकीन पोलिसांनी कारवाई केली. ऋतिक बाबासाहेब हिवाळे (वय २२, रा. तथागत नगर) व अफजल अन्वर पठाण (वय २७, रा. पैठण वेस) अशी दोघांची नावे आहेत. दोन्ही ठिकाणांहून ४ हजार ६५० रुपयांचा मुद्देमाल जप्त करण्यात आला. या दोघांविरुद्ध भारतीय न्याय संहितानुसार २२३, १२५ सह पर्यावरण संरक्षण अधिनियम १९८६ प्रमाणे ५,१५ नुसार गुन्हा दाखल केला आहे. ही कारवाई सहायक पोलिस निरीक्षक नीलेश शेळके यांच्या मार्गदर्शनात पोलिस उपनिरीक्षक महेश घुगे, पोलिस नाईक योगेश वाघमोडे, कृष्णा आधाट यांच्या पथकाने केली..जवाहरनगर पोलिसात पहिला गुन्हा दाखलछत्रपती संभाजीनगर : नायलॉन मांजाने गळा चिरल्याने जखमी झालेल्या वाहनधारकाच्या तक्रारीवरून जवाहरनगर पोलिस ठाण्यात पहिला गुन्हा दाखल करण्यात आला. अज्ञात आरोपी विरुद्ध हा गुन्हा दाखल करण्यात आला असून या आरोपीचा शोध घेण्याचे आव्हान पोलिसांसमोर आहे..२१ डिसेंबरला सकाळी ११ वाजता पांडुरंग कांतीलाल पतकुले (वय २८, रा. कैलासनगर) हे अरिहंतनगर भागात मुलाला शाळेतून आणण्यासाठी दुचाकीवर जात होते. यावेळी जवाहरनगर भागात त्यांच्या गळ्यात नायलॉन मांजा अडकल्याने गळा आणि मानेला गंभीर जखम झाली होती. त्यांच्यावर सध्या हेडगेवार रुग्णालयात उपचार सुरू आहेत. याप्रकरणी पतकुले यांच्या तक्रारीवरून अज्ञात आरोपीविरुद्ध गुन्हा दाखल करण्यात आला असून जमादार पोटे तपास करीत आहेत. शोधासाठी विशेष पथक नेमण्यात आले आहे. दरम्यान, या प्रकरणातील नायलॉन मांजा विक्रेते आणि नायलॉन मांजाने पतंग उडवणाऱ्यावरदेखील कारवाईचा इशारा देण्यात आला आहे..दरम्यान, सध्या मकरसंक्रांतीचा सण जवळ आला आहे. त्यामुळे दाट लोकवस्तीच्या भागात आणि मोकळ्या जागांवर अनेकजण पतंग उडविताना दिसतात. त्यातील बरेचजण या मांजाचा वापर करतात. त्यामुळे अशा पतंगबाजांवर कारवाई करण्याची मागणी होत आहे.तर विक्रीची दुकाने सील करूछत्रपती संभाजीनगर : नफा अधिक असल्याने विक्रेत्यांकडून लपून-छपून नायलॉन मांजाची विक्री केली जात आहे. परंतु, हा मांजा लोकांच्या जिवावर उठला आहे. यामुळे कुठेही असा मांजा विक्री होत असेल तर महापालिकेला माहिती द्या, नाव गुप्त ठेवण्यात येईल. नागरिकांनी दिलेल्या माहितीआधारे संबंधित विक्रेत्यांवर कारवाई करून दुकान सील केले जाईल. अनधिकृत असेल तर तोडण्यात येईल, असे महापालिका प्रशासक जी. श्रीकांत यांनी सांगितले..नायलाॅन मांजामुळे शहरात अनेक नागरिक जखमी झाले आहेत. शिवाय पक्ष्यांनाही त्याचा धोका पोचलेला आहे. त्यामुळे महापालिकेच्या नागरिक मित्र पथकाकडून शहरातील पतंग, मांजा विक्री केल्या जाणाऱ्या दुकानांची तपासणी केली जात आहे..Weather forecast : तापमान वाढणार, थंडी कमी होणार, ११ जिल्ह्यांत ढगाळ वातावरणाची शक्यता .पतंग उडविणाऱ्यांकडेही नायलॉन मांजा आहे का, याचाही शोध घेतला जात आहे. याअंतर्गत आमखास मैदानावर एका मुलाकडे दोन ते अडीच किलो गट्टू नायलॉन मांजा सापडला. तपासणी करत असतानाच गट्टू तिथेच फेकून मुलाने धूम ठोकली. दुसरी घटना दर्गा चौकात घडली. मांजा वापरणाऱ्या मुलांकडून मिळालेल्या माहितीआधारे दुकानावर छापा मारला असता, विक्रेता आधीच पसार झाला होता. किरकोळ विक्रेत्यापेक्षा ऑनलाईन नायलॉन मांजा मागवण्याचे प्रमाण अधिक असल्याचे सूत्रांनी सांगितले..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Nylon Manja : नायलॉन मांजामुळे दुचाकीस्वार जखमी, १७ टाके पडले

Related Stories