छत्रपती संभाजीनर : मॉन्सूनपूर्व पावसाने मराठवाड्यातील आठही जिल्ह्यांत दमदार हजेरी लावली. नांदेडमध्ये ढगपुटीसदृश परिस्थितीसह धाराशिव जिल्ह्यात अतिवृष्टीची नोंद झाली आहे. नांदेड जिल्ह्यातील हादगाव तालुक्यात वरवट गावातील नाल्यात एक महिला व तिच्या दोन मुली वाहून गेल्याने मृत्युमुखी पडल्याची घटना मंगळवारी (ता.२७) घडली. वादळी वाऱ्यासह ठिकठिकाणी विजाही कोसळल्या आहेत. विविध जिल्ह्यांतील ४० घरांवरील पत्रे उडाले.