पुणे - औरंगाबाद राष्ट्रीय महामार्गावर भीषण अपघात; कार चालक जागीच ठार

कायगाव (औरंगाबाद): औरंगाबाद - पुणे राष्ट्रीय महामार्गावर औरंगाबादहुन नगरच्या दिशेने जाणाऱ्या ट्रकला पाठीमागून येणाऱ्या भरधाव कारने जोराची धडक दिली आहे. यामुळे कारचालकाचा जागीच मृत्यू झाल्याची घटना भेंडाळा (ता.गंगापूर) शिवारात मंगळवारी (ता.29) सकाळी सहा ते साडे सहाच्या दरम्यान घडली. अनिल एकनाथ महाजन असे मृत्यू झालेल्या कार चालकाचे नाव आहे.

पोलिस सूत्रांकडून मिळालेल्या माहितीनुसार, जळगाव जिल्ह्यातील जामनेर तालुक्यातील ओझर गावचे रहिवासी अनिल एकनाथ महाजन वय (31) वर्ष हे कार (क्रमांक. MH 01 BF,6297) घेऊन औरंगाबादहुन पुण्याकडे जात होते. औरंगाबाद - पुणे राष्ट्रीय महामार्गावरील भेंडाळा (ता.गंगापूर) शिवारातून ते जात असताना त्यांचे कार वरील नियंत्रण सुटल्याने समोर चालणाऱ्या ट्रकला (क्रमांक MH.16 AY 1107) मागून त्यांच्या भरधाव कारने जोराची धडक दिली.

या दुर्दैवी रस्ता अपघातात कार चालक अनिल एकनाथ महाजन याचा जागीच मृत्यू झाला. तर ट्रक चालक यशवंत काकडे (रा. पारनेर जिल्हा अहमदनगर) यांना किरकोळ मार लागला. गंगापूर पोलिसांना रस्ता अपघाताची माहिती मिळताच त्यांनी तात्काळ घटनास्थळी धाव घेत क्रेनच्या सहाय्याने कार बाजूला घेत मृतदेह बाहेर काढून गंगापूर उपजिल्हा रुग्णालयात शविच्छेदनसाठी पाठवले.

शविच्छेदन करून मृतदेह नातेवाईकांच्या ताब्यात देण्यात आला. या प्रकरणी रस्ता अपघात घटनेची गंगापूर पोलीस ठाण्यात नोंद करण्यात आली असून पुढील तपास पोलिस निरीक्षक संजय लोहकरे यांच्या मार्गदर्शनाखाली पोलीस उपनिरीक्षक दीपक औटे हे करत आहेत.