चिकलठाणा धावपट्टीवर भलामोठा अजगर

औरंगाबाद - एखादा साप (Snake) दिसला तरी, अनेकांची भंबेरी उडते. पळताभूई थोडी होते. वेळ रात्रीची असल्यास वातावरण आणखीनच टाईट असते. चिकलठाणा विमानतळाचे (Chikalthana Airport) पर्यवेक्षक मंगेश साळवे यांना असाच काहीसा अनुभव आला. धावपट्टीवर भलामोठा अजगर (Python) दिसला. याचवेळी प्रसंगावधान राखत सर्पमित्रांना बोलावून घेतले. त्यानंतर अजगराला नैसर्गिक अधिवासात सोडण्यात आले.

औरंगाबादच्या चिकलठाणा विमानतळावर शुक्रवारी (ता. १) रात्री सव्वा दहा वाजता पर्यवेक्षक मंगेळ साळवे हे पाहणी करत असताना त्यांना धावपट्टीवर अजगर दिसून आला. त्यांनी तत्काळ एटीसी इन्चार्ज मॅनेजर विनायक कटके यांना ही बाब कळविली. सर्पमित्र नितेश जाधव, पुष्पा शिंदे, शरद दाभाडे यांना बोलावून घेण्यात आले. तब्बल दहा फुट लांबीचा अजगर पकडण्यासाठी सर्पमित्रांना तब्बल एक तास लागला.

अजगर हा शेड्युल वन मध्ये गणला जाणारा साप आहे. आधीच त्याच्या प्रजाती कमी होत असताना विनायक कटके यांनी दिलेले योगदान कौतुकास्पद असल्याचे सर्पमित्रांनी सांगितले. अजगराला पकडल्यानंतर डॉ. किशोर पाठक यांच्या निगरानीत त्याला रात्रभर ठेवण्यात आले. त्यानंतर वनविभागाच्या संमतीने शनिवारी (ता. २) सकाळी अजगराला सारोळा जंगलात सोडण्यात आले आहे.