Sambhaji Nagar Crime News : घर फोडून तीन लाखांचा ऐवज लंपास ; नारेगाव, भाट गल्ली येथील घटना

नारेगाव : मजूर कुटुंबाच्या उघड्या दरवाजाचा फायदा घेत चोरट्याने ३ लाख ३८ हजार रुपयांचा ऐवज लंपास केला. यामध्ये रोख अडीच लाख रुपयांचा समावेश आहे. तीन मार्चला रात्री हा प्रकार भाट गल्ली, नारेगाव येथे घडला. या प्रकरणी सिडको एमआयडीसी पोलिस ठाण्यात अज्ञाताविरुद्ध चोरीचा गुन्हा दाखल करण्यात आला.

अलका साईनाथ धुमाळ (वय ४५, रा. भाटनगर, नारेगाव) या महिलेने तक्रार दाखल केली. धुमाळ यांच्या घराचे बांधकाम सुरू असल्याने ते सध्या कुशाराम काळे यांच्या घरात किरायाने राहतात. ३ मार्चला रात्री धुमाळ यांचा मुलगा रोहित हा फोटोग्राफी शूटिंगची ऑर्डर करून घरी आला. यावेळी त्याने त्याची कॅमेऱ्याची बॅग घरात ठेवली. रात्री जेवण झाल्यानंतर धुमाळ कुटुंब झोपी गेले.

घरातील दरवाजा हा फुगलेला असल्याने त्याची कडी लागत नसल्याने त्यांनी दरवाजा फक्त लोटून घेतला होता. सकाळी उठल्यानंतर त्यांच्या सुनेला तिचा मोबाइल घरात आढळला नाही. तसेच मुलाची कॅमेऱ्याची बॅगदेखील जागेवर नव्हती.

धुमाळ यांनी तपासणी केली असता त्यांना त्यांचेदेखील मोबाइल तसेच सेंट्रिंगचे लाकूड कापायची मशीन आणि कपाटातील रोख अडीच लाख रुपये दिसून आले नाहीत. त्यावरून घरात चोरी झाल्याचे लक्षात आले. चोरट्यांनी ३ लाख ३८ हजारांचा ऐवज लंपास केला. धुमाळ यांच्या तक्रारीवरून चोरट्यांविरुद्ध चोरीचा गुन्हा दाखल करण्यात आला असून, पोलिस नाईक पठाण पुढील तपास करीत आहेत.