Sambhaji Nagar : लम्पी’चा जोर वाढल्याने जनावरांचा बाजार बंद

फुलंब्री - छत्रपती संभाजीनगर जिल्ह्यासह फुलंब्री तालुक्यातही लम्पी स्कीन रोगाचा शिरकाव वाढला आहे. या पार्श्वभूमीवर दर सोमवारी वडोद बाजार येथे भरणारा जनावरांचा आठवडी बाजार बंद करावा, या बाबत जिल्हाधिकाऱ्यांनी ग्रामपंचायतीला पत्रव्यवहार केला होता. यानुसार वडोद बाजार ग्रामपंचायतीने सोमवारी जनावरांचा भरणारा आठवडी बाजार बंद ठेवण्याचा निर्णय घेतला असून, याची अंमलबजावणी सोमवारपासून सुरू करण्यात आली.

तालुक्यातील वडोद बाजार येथे दर सोमवारी गाय, बैल, म्हैस, घोडा या जनावरांचा मोठा आठवडी बाजार भरतो. यातून कोट्यवधी रुपयांची उलाढाल होते. परंतु, मागील काही दिवसांपासून लम्पी रोगाने डोकेवर काढल्यामुळे जनावरांत या रोगाचा प्रसार वेगाने होऊ लागला आहे.

त्यामुळे जिल्हाधिकाऱ्यांनी वडोद बाजार येथील आठवडी बाजार बंद ठेवावा, म्हणून ग्रामपंचायतीला पत्रव्यवहार केला होता. यामुळे बाजार येथे सोमवारी भरणारा आठवडी बाजार बंद ठेवण्यात आला होता. पण, बाजार बंदची माहिती अनेकांना नसल्याने त्यांना आल्या पावली पुन्हा माघारी जावे लागले.

किरकोळ बाजार सुरू

तालुक्यातील वडोद बाजार येथे दर सोमवारी भरविण्यात येणारा गाय, बैल, म्हैस, घोडा यांचा बाजार भरण्यात आला नाही. परंतु, शेळी, मेंढी, बाजार भाजीपाला व इतर किरकोळ बाजार नियमितपणे सुरू होता. त्यामुळे जनावरे खरेदी विक्रीसाठी आणलेल्या व्यापारी व शेतकऱ्यांना आल्या पावली आपली जनावरे पुन्हा वापस घेऊन जावे लागले.

जिल्हाधिकारी यांच्या सूचनेनुसार वडोद बाजार येथील गाय, म्हैस, बैल आणि घोडा या जनावरांचा बाजार बंद ठेवण्यात आला होता. शेतकऱ्यांनी व व्यापाऱ्यांनी आपापल्या जनावरांना लम्पीचे लसीकरण करून घ्यावे.

डॉ. गोपाळ वाघ, उपसरपंच, वडोद बाजार

जनावरांचे लसीकरण करून घ्यावे

फुलंब्री तालुक्यातील शेतकऱ्यांनी व व्यापाऱ्यांनी जनावरांना फऱ्या व ‘लम्पी’पासून संरक्षण मिळण्यासाठी लसीकरण करून घ्यावे व ग्रामपंचायतला सहकार्य करावे, असे आवाहन वडोद बाजार ग्रामपंचायतीच्या वतीने करण्यात आले आहे.