Sambhaji Nagar : पावसाअभावी वाळलं अन् ‘लष्कर’ने संपवलं

फुलंब्री - फुलंब्री तालुक्यात पावसाचे प्रमाण कमी असल्यामुळे पावसाअभावी पिके वाळू लागली आहे. एकीकडे पावसाअभावी पिके वाळले तर दुसरीकडे मका पिकावर लष्कर अळीने संपवलं. अशी परिस्थिती असून यामुळे बळिराजा संकटात सापडला आहे.

फुलंब्री तालुक्यामध्ये सुमारे ५७ हजार हेक्टर क्षेत्रामध्ये खरिपाची लागवड शेतकऱ्यांनी केलेली आहे. यावर्षी पावसाने उशिरा हजेरी लावल्यामुळे शेतकऱ्यांच्या खरिपाची पेरणी उशिरा झाली. जुलै महिन्याच्या शेवटच्या आठवड्यात खरिपाच्या पेरण्या झाल्यामुळे पिकाची वाढ अद्याप कमीच आहे.

जुलै महिन्याच्या शेवटच्या आठवड्यात झालेल्या रिमझिम पावसावरच शेतकऱ्यांनी खरिपाची लागवड केली. रिमझिम पावसावरच तालुक्यातील पिके तग धरून उभी होती. जुलै महिना संपूर्ण ढगाळ वातावरण असल्यामुळे खरिपाच्या पिकात किडीने हल्ला केला.

ढगाळ वातावरण पिकावरील किडींना पोषक असल्यामुळे या किड्यांनी खरिपातील पिकांचे मोठे नुकसान झाले असून विशेषतः मका पिकावरील लष्करी अळीमुळे जवळपास पीक हातातून गेल्यात जमा आहे.

गत गेल्या आठ दिवसापासून ढगाळ वातावरण कमी होऊन उन्हाचे प्रमाण वाढल्यामुळे दिवसभर पडणाऱ्या उन्हात पिके वाळू लागले आहे. खरिपातील पिके वाळल्यामुळे महागडी बियाणे आणून लागवड केल्यानंतर महागडे रासायनिक खते व औषधी फवारणी करण्यावर शेतकऱ्यांनी आता भर दिला आहे. परंतु पावसाचे प्रमाण नसल्यामुळे शेतकरी राजा अडचणीत सापडला आहे.

खरिपातील पिकांना जोरदार पावसाची प्रतीक्षा असून येत्या आठ दिवसात पाऊस न पडल्यास खरिपातील संपूर्ण पीक हातातून जाण्याची शक्यता आहे. दुसरीकडे पिण्याच्या पाण्याचाही प्रश्नही गंभीर होणार असल्याने त्याबाबत प्रशासनाला आतापासूनच नियोजन करावे लागणार आहे.

शेतकऱ्यांना मोठ्या पावसाची प्रतीक्षा

फुलंब्री तालुक्यात यावर्षी एकही दमदार पाऊस झाला नसल्यामुळे खरिपातील पिकांची अवस्था बिकट झालेली आहे. खरिपाची पेरणी केल्यानंतर रिमझिम पावसावरच पिके उभे असल्याने फुलंब्री तालुक्यातील शेतकरी मोठ्या पावसाच्या प्रतीक्षेत असल्याचे दिसून येत आहे