Sambhaji Nagar Crime : पोलिसांनी जप्त केली धारदार तलवार

Sambhaji Nagar Crime - तालुक्यातील पाल येथील जाधववाडी वस्तीवर राहणाऱ्या एका तरुणाकडून फुलंब्री पोलिसांनी धारदार तलवार जप्त केली आहे. या प्रकरणी सदरील तरुणावर गुन्हा दाखल करून ताब्यात घेत जेरबंद करण्यात आले. विक्रम संजय धनावत (रा. जाधववाडी वस्ती, पाल ता. फुलंब्री) असे गुन्हा दाखल झालेल्या तरुणाचे नाव आहे.

पोलिसांनी दिलेली माहिती अशी की, पोलिस उपनिरीक्षक श्रीनिवास धुळे हे पोलिस हेड कॉन्स्टेबल राजू तेलगोटे यांना सोबत घेऊन सरकारी वाहनाने पेट्रोलिंग करीत होते.

त्यांना पाल येथील जाधववाडी वस्तीवर राहणाऱ्या तरुणाकडे धारदार तलवार असल्याची माहिती मिळाली होती. यावरून पोलिस निरीक्षक रवींद्र निकाळजे यांना या प्रकाराची माहिती देण्यात आली होती. त्यावरून पोलिस उपनिरीक्षक श्रीनिवास धुळे यांनी सापळा रचला.

पाल येथील जाधववाडी वस्तीवर जाऊन विक्रम धनावत यांच्या घरी जाऊन छापा टाकला असता धारदार तलवार मिळून आली.

ही कारवाई पोलिस अधिक्षक मनीष कलवनिया,अपर पोलिस अधिक्षक सुनील लांजेवार, उपविभागीय पोलिस अधिकारी जयदत्त भवर, पोलिस निरीक्षक रवींद्र निकाळजे यांच्या मार्गदर्शनाखाली पोउपनि श्रीनिवास धुळे, पोलिस हेडकॉन्स्टेबल मुजीब सय्यद, पोलिस हेड कॉन्स्टेबल राजू तेलगोटे यांनी केली.