Sambhaji Nagar : कोट्यवधींची उलाढाल; संभाजी नगरात सोने, चांदीच्या वस्तू खरेदीसाठी ग्राहकांची गर्दी

पैठण - अधिक महिन्यात व्रत-वैकल्यांबरोबरच धोंडा साजरा करण्यात येत आहे. अधिकमासात जावई व लेकीसाठी नवीन कपडे, चांदीचे निरंजन व जोडवी, पैंजणाची खरेदी जोमात होत आहे. दररोज लाखोंची खरेदी होत असून यामुळे आतापर्यंत १० कोटींची उलाढाल झाल्याचे पैठण येथील सराफ बाजारपेठेला झळाळी मिळाल्याचे चित्र आहे.

अधिक मासात जावयाला वाण देण्याची परंपरा एकविसाव्या शतकातही जपली जात आहे. त्यामुळे जावयाला सोन्याचे दिवस आले आहे. यंदा अधिकमास आल्याने अधिक मास आणि नंतर श्रावण महिना सुरू होणार आहे. अधिक महिन्यात धार्मिक कार्यक्रमांची रेलचेल वाढली आहे. कार्यक्रमांबरोबरच व्रतवैकल्यांची नवविवाहितांसाठी अधिक महिन्याचे विशेष महत्त्व आहे.

अधिक महिन्यात मुलगी व जावई यांना बोलावून पाहुणचार करण्याची परंपरा कायम आहे. यावेळी गोड जेवणाबरोबरच नवीन कपडे व भेटवस्तू दिल्या जातात.

नवीन जावयाला चांदीचे पूजा ताट, निरंजन तर मुलीला चांदीची जोडवी, पैंजण तसेच सोन्याचे दागिने दिले जातात. त्यामुळे सध्या येथील बाजारपेठेत सोने, चांदीच्या वस्तू खरेदीसाठी गर्दी होत आहे.

अधिक मास अंतिम टप्प्यात आल्याने घरोघरीलेक जावयाचे कौतुक सोहळे सुरु आहेत. त्यासाठी जोमात खरेदी केली जात आहे. कापड बाजारपेठेसह सराफी पेढ्यांवर गर्दी होत आहे. पै-पाहुण्यांनाही अधिकमासासाठी बोलविण्यात येत आहे.

या महिन्यात मिठाईलाही मागणी वाढली आहे. अधिक मासामुळे बाजारपेठेत आर्थिक उलाढाल वाढली आहे. बाजारपेठेत अर्थकारणाला चालना मिळाली आहे . यामुळे पैठण येथे सराफ पेठेत सोने चांदीच्या वस्तू खरेदीची लगबग सुरू असून दररोज आहे. सराफांच्या दुकानात ग्राहकांची गर्दी वाढत आहे.

अधिकमासात जावयाला वाण देण्याची प्रथा आजही उत्साहाने जपली जात आहे. त्यामुळे आतापासून सराफ पेठेत खरेदीची लगबग सुरु झाली आहे. चांदीच्या वस्तू दोनशे रुपयांपासून दहा हजार रुपयांपर्यंत उपलब्ध आहेत.

अधिक मासाच्या महिन्यात महिलांची सोने चांदी वस्तू खरेदीसाठी गर्दी होत आहे. यामुळे कोट्यवधीची आर्थिक उलाढाल होत आहे. वाण देण्याची पद्धत बदलली असली तरी परंपरेची साखळी अतूट राहिल्याने सासरे, जावई व सासू यांच्या नात्यातील स्नेहबंध दृढ होत आहेत.

- कृष्णा लोळगे, सोने चांदी व्यावसायिक, पैठण.