'खते, बियाणे कमी पडू देणार नाही', मंत्री संदीपान भुमरेंची जायकवाडीत खरीप आढावा बैठक

जायकवाडी (औरंगाबाद): पैठण तालुका कृषी अधिकारी कार्यालयाची खरीप हंगाम बैठक कोरोनाच्या पार्श्र्वभूमीवर रोजगार हमी व फलोत्पादन मंत्री संदीपान भुमरे (sandipan bhumare) यांच्या अध्यक्षतेखाली ऑनलाईन घेण्यात आली. यावेळी मंत्री भुमरे यांनी शेतकऱ्यांना रासायनिक खत, बियाणे कमी पडू देणार नाही, अशी ग्वाही दिली.

खरीप हंगाम २०२१-२२ नियोजन व आढावा बैठक रविवारी पार पडली. सदरील बैठक ऑनलाईन असून सुद्धा अडीचशे ते तीनशे शेतकरी, अधिकारी कर्मचाऱ्यांनी सहभाग घेतला. यावेळी तालुक्यातील रासायनिक खत मागणी व पुरवठा बाबत आढावा घेण्यात आला. यावेळी भुमरेंनी शेतकऱ्यांना दर्जेदार व रास्त भावात खत पुरवठा करावे, असे निर्देश विक्रेते व यंत्रणेला दिले.

यावेळी तालुका कृषी अधिकारी संदीप शिरसाठ यांनी कृषी विभागाकडून खरीप हंगामात राबविण्यात येणाऱ्या विविध योजनांविषयी सादरीकरण केले. याप्रसंगी बैठकीला जिल्हा अधीक्षक कृषी अधिकारी डॉ.तुकाराम मोटे, कृषी विकास अधिकारी आनंद गंजेवार, उपविभागीय कृषी अधिकारी अनिल हातगावकर यांनी मार्गदर्शन केले.

याप्रसंगी पंचायत समिती सभापती अशोक भवर, उपसभापती कृष्णाजी भुमरे, गट विकास अधिकारी बागूल, शिवसेना उपजिल्हाप्रमुख विनोद बोंबले, जिल्हा परिषद सदस्य, पंचायत समिती सदस्य, मंडळ कृषी अधिकारी किशोर पाडळे, नंदकिशोर थोरे, रामनाथ कारले, विशाल साळवे, योगेश सोनवणे, सुहास धस, कृषी अधिकारी विकास पाटील, विस्तार अधिकारी शेषराव चांदणे, चोंधे, यशवंत चौधरी, राजू गावडे सहआदी उपस्थित होते.