Sambhaji Nagar News : जिल्हाधिकारी कार्यालय ठप्प

छत्रपती संभाजीनगर : जुन्या पेन्शनच्या मागणीसाठी राज्य सरकारी कर्मचारी मध्यवर्ती संघटनेच्या कर्मचाऱ्यांनी गुरुवारी (ता. १४) संप केला. त्यामुळे जिल्हाधिकारी कार्यालयातील कामकाज दिवसभर ठप्प होते. या संपात जिल्ह्यातील ४० हजार कर्मचारी सहभागी झाल्याचा दावा कर्मचारी संघटनेने केला. संपाच्या पहिल्या दिवशी राज्य तलाठी महासंघातर्फे जिल्हाधिकारी कार्यालयासमोर जोरदार घोषणाबाजी करीत जुन्या पेन्शनच्या मागणीचा प्रश्‍न प्रकर्षाने मांडला.

यात राज्य तलाठी महासंघाचे अध्यक्ष अनिल सूर्यवंशी, इंदुमती थोरात, विभागीय सचिव महेंद्र गिरगे, तलाठी संघटनेचे अध्यक्ष सतीश भदाणे, संजय महाळंकर, सुरेश करपे सहभागी होते. संपामुळे जिल्हाधिकारी कार्यालयात अनेक ठिकाणी शुकशुकाट दिसून आला. अभ्यागतही कार्यालयात आले नाहीत. फोनवरूनच अनेकांना सुनावण्यांची तारीख सांगण्यात आली.

कार्यालयात वरिष्ठ अधिकारी दिसून आले नाही. जिल्हा प्रशासनातील ९६३ पैकी ९५५ कर्मचारी संपात सहभागी होते. संप १०० टक्के यशस्वी झाल्याचा दावा सरकारी कर्मचारी संघटनेचे राज्य उपाध्यक्ष डॉ. देविदास जरारे यांनी दिला.

या संघटनांनी घेतला सहभाग

राज्य सरकारी मध्यवर्ती कर्मचारी संघटनेच्या नेतृत्वात राज्य तलाठी संघ, नर्सेस फेडरेशन, महसूल, पाटबंधारे, पोलिस, भूमी अभिलेख, कास्ट्राइब, वनविभाग, माहिती व जनसंपर्क विभाग, कारागृह, भूजल सर्वेक्षण, पशुसंवर्धन, घाटी, वाहनचालक, चतुर्थश्रेणी, शिक्षक सेना, शिक्षक भारती, शिक्षक परिषद, शिक्षक समिती, जुनी पेन्शन हक्क संघटना, विद्यापीठ, राज्य उत्पादन शुल्क, माजी सैनिक संघटना, एफडीए संघटना, शिक्षकेतर कर्मचारी संघटना, कोषागार संघटना, राज्य विमा कामगार दवाखान्यातील कर्मचाऱ्यांनी सहभाग घेतला.