चिव चिव ये, दाणा खा, पाणी पी...; जालन्‍यात उन्हाळ्यानिमित्त विद्यार्थ्यांचा पुढाकार

जालना : उन्हाळ्याची चाहूल लागली आहे. उन्हाचा पारा वाढत असताना उडत्या पाखरांना दाणा- पाणी ठेवण्याचा अनोखा उपक्रम संस्कार प्रबोधिनी विद्यालयातील विद्यार्थ्यांनी सुरु केला आहे. बालपणीच्या चिव चिव ये, दाणा खा, पाणी पी ! असा जणू अनुभव शालेय विद्यार्थी घेत आहेत, हे विशेष.

संस्कार प्रबोधिनी माध्यमिक विद्यालयातील विद्यार्थ्यांनी दरवर्षी प्रमाणे याहीवर्षी उन्हाची तीव्रता वाढताच घरासमोरील झाडांवर, छतावर मातीचे परळ व वेगवेगळ्या भांड्यात चिमण्यांसाठी,पक्षांसाठी दाणा पाण्याची व्यवस्था केली आहे. उन्हाळ्यात तापमान वाढल्यामुळे पाण्यासाठी पक्षी सर्वत्र भटकंती करतात. पक्षांबाबत विद्यार्थ्यांमध्ये भूतदया निर्माण व्हावी म्हणून विद्यालयाच्या वतीने विद्यार्थ्यांना उपक्रमशील शिक्षक रामदास कुलकर्णी यांनी घरासमोरील झाडावर पाखरांच्या दाणा पाण्याची व्यवस्था करण्याचा उपक्रम विद्यार्थ्यांना देण्यात आला आहे.या उपक्रमात झाडांवर परळ आणि विविध मातीची भांडी बांधून दाणा- पाण्याची व्यवस्था विद्यार्थी करीत आहे.

शाळेतील विद्यार्थी अंकिता नन्नवरे, आस्था भालेराव,वैष्णवी पुंड, विनायक जाधव,रेवती इंगळे, श्रुती भालेराव, प्रसाद अरगडे, अंजली उगले, तेजस पवार या विद्यार्थ्यांनी यात सहभाग घेतला घेतला आहे. रोज पक्षांसाठी दाणा- पाण्याची व्यवस्था हे विद्यार्थी करीत आहेत. संस्थेचे अध्यक्ष सुरेश कुलकर्णी, सचिव विजय देशमुख,विनायक देशपांडे, प्रा.राम भाले, प्रा.केशसिंह बगेरीया,डॉ. जुगलकिशोर भाला यांनी कौतुक केले आहे.

''आता ऊन वाढत असल्याने पक्ष्यांना पाण्याची सुविधा करावी,असा उपक्रम आमचे रामदास कुलकर्णी सर यांनी आम्हांला दिला. मी रोज त्यात चिमण्यासाठी पाणी टाकते व चिमण्या पाणी पितानाचा आनंद शब्दात सांगू शकत नाही.''

- अंकिता नन्नवरे विद्यार्थिनी, जालना

''उन्हाळ्यात चिमणी पाखरासाठी मी दाणे टाकते आणि पाणी ठेवते. यामुळे वेगळाच आनंद मिळतो.''

- रेवती इंगळे विद्यार्थिनी, जालना