कौतुकास्पद! वृद्ध दाम्पत्याने बैलगाडीत जाऊन घेतली कोरोनाची लस

जातेगाव (जि बीड): सुर्डी बूद्रूक (ता गेवराई) येथील एका वृध्द दाम्पत्यांनी गुरुवार (ता 3) जातेगाव प्राथमिक आरोग्य केंद्रात बैलगाडीने जाऊन कोरोनाची लस (covid 19 vaccination) टोचून घेतली आहे.कोरोनाचा प्रसार मागील वर्षापासून वाढत होता. गेल्या वर्षी कोरोनाचा प्रभाव जास्त शहरांत दिसून आला होता पण या लाटेत ग्रामीण भागासह गावखेड्यांत फैलाव मोठा असल्याचे दिसत आहे.

गेवराई तालुक्यात जवळपास चाळीस नागरिकांचा कोरोनामुळे मृत्यू झाला. कोरोना साथ आटोक्यात यावी यासाठी केंद्र आणि राज्य शासनाककडून लॉकडाऊन 15 जूनपर्यंत वाढविले आहे. दरम्यान, या लॉकडाऊन काळात 45 वर्षापुढील नागरिकांसाठी लसीकरण उपजिल्हा रुग्णालयात तसेच प्राथमिक आरोग्य केंद्रात सुरू असताना वृद्ध दाम्पत्यांना लसीकरण करुन घेताना अनेक अडचणींचा सामना करावा लागत आहे.

मात्र सुर्डी बूद्रूक येथील बळीराम तवले आणि त्यांच्या पत्नी यांनी गुरुवारी बैलगाडीने सुर्डी ते जातेगाव प्राथमिक आरोग्य केंद्र असा प्रवास करत या वृद्ध दाम्पत्यांनी कोविड लसीचा पहिला डोस टोचून घेतला. कोरोना साथ असल्याने या दाम्पत्यांनी ना रिक्षा, ना दूचाकीवर जाता बैलगाडीने जाऊन लसीकरण करुन घेतले. याबद्दल डॉ. प्रकाश फड व आरोग्य कर्मचारी यांनी तवले दाम्पत्यांचे कौतुक केले.