वाळूज महानगर भागासाठी करणार ५० कोटींची तरतूद

औरंगाबाद: सिडकोने विकसित केलेल्या वाळूज महानगराचा महापालिका हद्दीत समावेश करण्यासाठी समिती स्थापन करण्यात आली आहे. या समितीची बैठक बुधवारी (ता. २२) घेण्यात आली. त्यात या भागाला मूलभूत सुविधा देण्यासाठी महापालिकेच्या अंदाजपत्रकात ५० कोटी रुपयांची तरतूद करा, अशा सूचना महापालिकेचे प्रशासक आस्तिककुमार पांडेय यांनी अधिकाऱ्यांना केल्या.

महापालिकेची हद्दवाढ करून बजाजनगरसह वाळूज एमआयडीसीचा भाग समाविष्ट करण्यासाठी हालचाली सुरू आहेत. बांधकाम व्यावसायिकांची संघटना क्रेडाईतर्फे यासंदर्भात मागणी करण्यात आली होती. दरम्यान, सिडकोने विकसित केलेल्या वाळूज महानगरचा अभ्यास करण्यासाठी समिती स्थापन करण्यात आली होती. या समितीची बैठक बुधवारी डॉ. बाबासाहेब आंबेडकर संशोधन केंद्रात घेण्यात आली.

यावेळी वाळूज सिडको महानगरातील मूलभूत सुविधांबाबत चर्चा झाली. त्यात पाणी पुरवठा, रस्ते, पथदिवे व ड्रेनेज सुविधांचा समावेश होता. तसेच संभाव्य कामांचा अंदाज काढून सिडकोने महापालिकेस डेव्हलपमेंट चार्जेस भरावेत, यावर सहमती दर्शविण्यात आली. सद्यःस्थितीत उपलब्ध असलेल्या नागरी सुविधा रस्ते, ड्रेनेज लाईन व पथदिवे याची देखभाल व दुरुस्ती महापालिका करील. यापुढे नवीन रेखांकन आणि बांधकाम परवानगी देण्याचे अधिकार महापालिकेकडे असतील.

यावेळी प्रशासक आस्तिककुमार पांडेय यांनी वाळूज महानगर येथील देखभाल दुरुस्ती व इतर विकास कामांसाठी महापालिकेच्या अर्थसंकल्पात ५० कोटी रुपयांची तरतूद ठेवण्याची सूचना अधिकाऱ्यांना केली. बैठकीला अतिरिक्त आयुक्त बी. बी. नेमाने, शहर अभियंता सखाराम पानझडे, प्रभारी मुख्य लेखाधिकारी संजय पवार, उपायुक्त अपर्णा थेटे, कार्यकारी अभियंता बी. डी. फड, ए. बी. देशमुख, घनकचरा व्यवस्थापन कक्षप्रमुख नंदकिशोर भोंबे यांच्यासह समितीतील अधिकाऱ्यांची उपस्थिती होती.

या भागासाठी पाच हजार पथदिवे राखीव ठेवण्याचे निर्देश यावेळी पांडेय यांनी दिले. या भागात पाणी पुरवठ्याचा शहराच्या नवीन पाणी पुरवठा योजनेत समावेश करता येईल असे पांडेय यावेळी म्हणाले. सिडको वाळूज महानगरची ड्रेनेजलाइन कांचनवाडी एसटीपी प्लांटशी जोडण्याबाबत चर्चा करण्यात आली.