बीड : वाळू, कोळसामिश्रित खताची विक्री

माजलगाव : शहरात वाळू, कोळसामिश्रित खताची विक्री होत असल्याचे आढळताच दोन व्यापाऱ्यांच्या दुकानांवर गुरुवारी छापा टाकण्यात आला. त्यावेळी बोगस खताची तीस पोती आढळली. शहरामध्ये बोगस खत विक्रीच्या अनेक तक्रारी होत्या. प्लांटो नावाचे उसासाठी खत वापरले जाते. या कंपनीचा लोगो वापरून, कंपनीच्या बॅगप्रमाणे बनावट बॅगा बनवून खत विक्री होत असल्याबाबत कंपनीने न्यायालयात दावा दाखल केला होता. या दाव्याच्या अनुषंगाने न्यायालयाने विशेष इन्स्पेक्टर म्हणून संदीप हांगे यांची नियुक्ती केली.

त्यांच्या मार्गदर्शनाखाली कंपनीचे मार्केटिंग मॅनेजर स्वप्नील कोलते, संतोष जवंजाळ, अशोक कलापुरे, मनोज कोलते, सचिन अकोलकर, स्थानिक पोलिसांना सोबत घेऊन गणेश कृषी सेवा केंद्र व इतर एका ठिकाणी छापे टाकले. यावेळी तीस पोती बोगस खत आढळले. त्यात कोळसा आणि वाळू आढळली. या बनावट प्रकारामुळे शेतकऱ्यांची फसवणूक होत असल्याचा प्रकार उघडकीस आला. बनावट खताची पोती जप्त करण्यात आली. दरम्यान, शेतकऱ्यांनी खत खरेदी करताना सतर्कता बाळगावी, बोगस खत विक्री करणाऱ्यांची गय केली जाणार नाही, असे बाजार समितीचे सभापती संभाजी शेजूळ यांनी सांगितले.