बीडमधील वाढती कोरोना रुग्णवाढ ठरतेय चिंताजनक

बीड: जिल्ह्यात कोरोनाची दुसरी लाट ओसरत असली तरी रुग्णसंख्या दिडशे ते पावणेदोनशेंच्या घरात कायम आहे. त्यातच पॉझिटिव्हीटी रेटही अधूनमधून वाढत असून आष्टी तालुक्यातील संसर्गही कमी व्हायचे नाव घेत नाही. जिल्ह्यात मंगळवारी कोरोनाग्रस्तांचे सहा तर म्युकरमायकोसिच्या आणखी एका रुग्णाचा मृत्यू झाला.

कोरोनाचे नवीन १७० रुग्ण आढळले. कोरोनामुक्तांची संख्या तुलनेने कमी म्हणजे १०८ होती. सोमवारी ३५६१ लोकांच्या स्वॅब नमुन्यांच्या तपासणीचे अहवाल मंगळवारी हाती आले. यात १७० पॉझिटिव्ह रुग्ण आणि तपासणीच्या तुलनेत ४.७७ टक्के एवढे होते. बाधितांमध्ये आष्टी तालुक्यात सर्वाधिक ६४ तर अंबाजोगाई आठ, बीड १९, धारुर तीन, गेवराई १८, केज ११, माजलगाव सात, परळी दोन, पाटोदा १४, शिरूर १२ व वडवणी तालुक्यातील १२ रुग्णांचा समावेश आहे.

नवीन सहा कोरोनाबळींच्या नोंदीसह जिल्ह्यातील कोरोनाग्रस्ताच्या मृत्यूची संख्या २४९६ झाली. एकूण बाधितांची संख्या ९१ हजार ८५३ इतकी झाली. सध्या जिल्ह्यात एक हजार २३१ तर बाहेर जिल्ह्यात ४४ रुग्ण उपचार घेत असल्याची माहिती जिल्हा साथरोग अधिकारी डॉ. पी. के. पिंगळे यांनी दिली.

म्युकरचा नवा एक रुग्ण व एक मृत्यू-
मंगळवारी म्युकरमायकोसिस या काळ्या बुरशीमुळे होणाऱ्या आजाराच्या आणखी एका रुग्णाची वाढ झाली. रुग्णसंख्या आता १८६ झाली आहे. तर, आणखी एका मृत्यूची नोंद होऊन मृत्यूंची संख्या ३२ झाली आहे. सध्या अंबाजोगाईच्या स्वारातीमध्ये ९३ तर जिल्हा रुग्णालयात दोन असे ९५ रुग्ण उपचाराखाली आहेत. तर, आतापर्यंत ४७ रुग्णांना उपचारानंतर सुटी देण्यात आली आहे.