Beed Corona Update: रुग्णसंख्या, पॉझिटिव्हिटी रेट रोडावला, मृत्युसाखळी कायम

बीड: Beed corona updates कोरोना विषाणू संसर्गाची दुसरी लाट ओसरल्यानंतरही दोनशेंच्या घरात असलेली रुग्णसंख्या आता खाली आली आहे. तर, पॉझिटिव्हिटी रेटही खालावला असला तरी मृत्युसाखळी तुटायचे नाव घेत नाही. शुक्रवारी (ता. १३) साडेसहा हजारांहून अधिक लोकांच्या तपासण्यांमध्ये केवळ ११९ रुग्ण आढळले. परंतु, चार कोरोनाबळींची नोंद झाली. तर, म्युकरमायकोसिस या काळ्या बुरशीच्या आजाराचेही नवीन दोन रुग्ण आढळले. बीड व आष्टीतील कमी झालेल्या रुग्णसंख्येत काहीशी वाढ झाली. कोरोना विषाणू संसर्गाच्या दुसरी लाट मे अखेरीस ओसरल्यानंतरही जून - जुलै या दोन महिन्यांत जिल्ह्याची रुग्णसंख्या कायम दीडशे ते सव्वा दोनशेंच्या घरात राहिली. तर, पॉझिटिव्हिटी रेटही पाच टक्क्यांच्या घरात होता. मात्र, मागच्या काही दिवसांत रुग्णसंख्या व पॉझिटिव्हिटी रेटमध्ये घसरण झाली असली तरी रोजच्या मृत्यूसंख्येत घट व्हायला तयार नाही.

दरम्यान, गुरुवारी (ता. १२) तब्बल ६६०२ लोकांचे स्वॅब नमुने घेण्यात आले. याच्या तपासणीचे अहवाल शुक्रवारी हाती आले. यामध्ये ११९ कोरोनाग्रस्त आढळले. तर, ६४८३ लोकांचे स्वॅब नमुने निगेटिव्ह आले. तपासणीच्या तुलनेत रुग्ण आढळण्याचे प्रमाण १.८० टक्के होते. पुन्हा एकदा आष्टीत सर्वाधिक ४२ आणि बीड तालुक्यात २९ रुग्ण आढळले. दोन्ही तालुक्यांत गुरुवारी रोडावलेली रुग्णसंख्या पुन्हा वाढली. तर, अंबाजोगाईत सात, धारुरमध्ये आठ, गेवराईत तीन, माजलगावमध्ये चार, पाटोदात ११, शिरुरमध्ये चार, वडवणीत सहा रुग्णांची नोंद झाली. जिल्ह्याची रुग्णसंख्या आता तब्बल ९९४४६ झाली. तर, शुक्रवारी अनेक दिवसानंतर नव्या रुग्णांपेक्षा कोरोनामुक्तांचा आकडा अधिक नोंदला गेला. शुक्रवारच्या १४० कोरोनामुक्तांसह जिल्ह्यात आतापर्यंत ९४ हजार ७५६ कोरोनामुक्तांची नोंद झाली. सध्या २०२० कोरोनाग्रस्त जिल्ह्यात आणि जिल्ह्याबाहेर उपचार घेत आहेत.

मृत्युसत्र कायम; आणखी चार बळी-
कोरोना विषाणू संसर्गबाधीत रुग्णांची संख्या व पॉझिटिव्हिटी रेट मंदावला असला तरी मृत्यूसत्र कायम आहे. शुक्रवारीही आणखी चार कोरोनाबळींची नोंद झाली. जिल्ह्यात आतापर्यंत २६७० कोरोनाग्रस्तांच्या मृत्यूची नोंद झाली.

म्युकरचेही आणखी दोन रुग्ण वाढले-
कोरोनाच्या दुसऱ्या लाटेच्या शेवटी डोके वर काढलेल्या म्युकरमायकोसिस या काळ्या बुरशीमुळे होणाऱ्या आजाराच्या नव्या रुग्णांची संख्या अलीकडे थांबली होती. पण, शुक्रवारी आणखी दोन रुग्ण आढळले. आतापर्यंत जिल्ह्यात २१३ रुग्णांची नोंद झाली आहे. तर, सध्या १५ रुग्ण उपचाराखाली आहेत. आतापर्यंत १४७ रुग्ण उपचारानंतर बरे झाले असून ३७ रुग्णांचा मृत्यू झाला आहे.