कोरोना योध्देच उपाशी ; राज्यातील पाचशे सहायक प्राध्यापक पगारीविना

अंबाजोगाई (बीड): सध्या विविध कोविड केंद्रात कार्यरत असणारे शेकडो सहायक प्राध्यापक (कोरोनायोध्दे) गेल्या तिन महिन्यापासून पगाराविनाच कार्यरत आहेत. त्यांच्याकडे लक्ष देण्यास वैद्यकीय शिक्षण विभागास वेळच नाही. कोरोनाच्या संकट काळात हे डॉक्टर जिवाची पर्वा न करता पगाराविना राबत आहेत. शिवाय आंदोलन करूनही त्यांना सेवेत कायम करण्याचा प्रश्न शासनाने अद्याप लटकताच ठेवला आहे.

राज्यातील विविध वैद्यकीय महाविद्यालयात ५०० अस्थायी सहायक प्राध्यापक कार्यरत आहेत.  डिसेंबर २०२० च्या परिपत्रकानुसार या सहायक प्राध्यापकांचा सेवार्थ मधुन कंत्राटी मध्ये समावेश केला. हे अन्यायकारक असल्याच्या निषेधार्थ वैद्यकीय संघटनेने संप व कामबंद आंदोलन केले होते. आम्हाला सेवेत कायम करावे अशी मागणी त्यांनी वैद्यकीय शिक्षण मंत्री अमित देशमुख यांच्याकडे केली होती. त्यांनी आश्वासन दिल्यानंतर हे आंदोलन मागे घेण्यात आले होते. परंतू अद्याप या प्रश्नावर शासनाला निर्णय घेता आलेला नाही. उलट तिन महिने झाले तरी, या डॉक्टर असलेल्या सहायक प्राध्यापकांना बिनपगारी ठेवण्यात आले आहे. काही सहायक प्राध्यापकांचा तर जानेवारी २०२१ पासून पगार झालेला नाही. 

उजनीत किरकोळ कारणावरून हॉटेल व्यावसायिकामध्ये हाणामारी; एक गंभीर

कोरोनायोध्देच उपाशी-

यातील अनेक सहायक प्राध्यापक राज्यातील विविध कोविड सेंटरमध्ये कार्यरत आहेत, तर कोणी कोविड लॅबमध्ये सेवा देत आहेत. जीव धोक्यात घालून प्रत्यक्षात कोरोना रुग्णांची सेवा करणारेच उपाशी असतील तर त्यापेक्षा मोठे दुर्दैव कोणते असेच म्हणावे लागेल. राज्यातील १८ शासकीय वैद्यकीय महाविद्यालयात असे ५०० अस्थायी सहायक प्राध्यापक आहेत. त्यात स्वामी रामानंद तीर्थ वैद्यकीय महाविद्यालयात ४० अस्थायी प्राध्यापकांचा समावेश आहे. 
 

उदरनिर्वाह कसा करणार - डाॅ. अमित लोमटे

या अस्थायी सहायक प्राध्यापकांना सेवार्थ हेड मध्येच ठेवले असते, तर त्यांना वेळेवर पगार मिळाला असता. विनाकारण त्यांना कंत्राटी मध्ये टाकण्यात आले. मागील तिन महिन्यापासून पगार नसल्याने अस्थायी प्राध्यापकांना विविध समस्यांना तोंड द्यावे लागत आहे. कोणाला गाडीचा हप्ता असतो, काही जणांचे तर पूर्ण कुटुंबच यांच्या पगारावर अवलंबून असते. या संकटांना तोंड कसे देणार असे एक ना अनेक प्रश्न निर्माण होत असल्याच्या भावना वैद्यकीय शिक्षक संघटनेचे राज्य समन्वयक डाॅ. अमित लोमटे यांनी व्यक्त केली.

हा प्रश्न फक्त स्वाराती मधीलच नव्हे तर, राज्यभरातील अस्थायी प्राध्यापकांचा आहे. परंतू काही जणांच्या पगारी झालेल्या आहेत. निधी नसल्याने काहीच्या पगारी देणे बाकी आहे. या मार्च अखेर निधी उपलब्ध होताच त्यांच्या पगारी होतील असे स्वारातीचे अधिष्ठाता डॉ.  शिवाजी सुक्रे यांनी सांगितले.

हिंगोलीत संचारबंदीच्या पहिल्या दिवशी कडकडीत बंद, जागोजागी पोलिस बंदोबस्त

सेवेत कायम करण्याचे ?

या अस्थायी सहायक प्राध्यापकांनी सेवेत कायम करण्यासाठी काम बंद आंदोलन ही केले होते. आश्वासनामुळे पुन्हा काम सुरू केले. त्यालाही सहा महिने झाले. त्यावर अद्याप कार्यवाही झाली नाही. याबाबत उच्च न्यायालयानेही कोरोनात काम करणाऱ्या कर्मचाऱ्यांच्या पगारी महिन्याच्या एक तारखेला करण्याचे आदेश दिले होते. तरीही त्याचे पालन होताना दिसत नाही.हा कुठला न्याय असा प्रश्न वैद्यकीय शिक्षक संघटनेतून उपस्थित होत आहे.