आजपासून परळीचे प्रभू वैद्यनाथ मंदिर शिवभक्तांना दर्शनासाठी खूले

परळी वैजनाथ (बीड): येथील बारा ज्योतिर्लिंगांपैकी एक असलेल्या प्रभू वैद्यनाथाचे मंदिर कोरोनाच्या वाढत्या प्रादुर्भावामुळे भाविकांना दर्शनासाठी ४ एप्रिलपर्यंत मंदिर बंद करण्यात आले होते. मात्र सोमवारी (ता.०५) पासून शिवभक्तांना दर्शनासाठी पुन्हा सुरू करण्यात आले असल्याचे जिल्हाधिकारी रविंद्र जगताप यांनी रविवारी (ता.०४)) आदेशाद्वारे कळवले आहे. तब्बल २६ दिवसानंतर प्रभू वैद्यनाथाचे मंदिर शिवभक्तांना दर्शनासाठी खूले करण्यात आल्याने शिवभक्तांनी आनंद व्यक्त केला आहे.

बारा ज्योतिर्लिंगांपैकी एक असलेल्या प्रभू वैद्यनाथ मंदिरात महाशिवरात्री महोत्सव यंदा कोरोना विषाणूची दुसरी लाट आल्याने हा रद्द करून भाविकांना दर्शनासाठी वैद्यनाथ मंदिर पूर्णपणे ८ ते १६ मार्च दरम्यान  बंद करण्यात आले होते. १६ मार्च नंतरही कोरोनाचा प्रादुर्भाव वाढत चालल्याने त्यास २२ मार्च पर्यंत मुदतवाढ देण्यात आली. या कालावधीत कोरोना विषाणूचा प्रादुर्भाव कमी होण्याऐवजी जिल्ह्यात वाढतच चालल्याने वैद्यनाथ मंदिर बंदला ४ एप्रिल पर्यंत मुदतवाढ देण्यात आली होती.

'कोट्यवधीचा हिशोब नको, मराठवाड्याला फक्त ५०० व्हेंटीलेटर द्या',...

मात्र रविवारी (ता.०४) काढलेल्या आदेशानुसार प्रभू वैद्यनाथ मंदिर व आंबेजोगाई येथील श्री.योगेश्वरी देवीचे मंदिर सकाळी ७ ते दुपारी १२ वाजेपर्यंत दर्शनासाठी भाविकांना खुले करण्यात आले आहे. मात्र दर्शन घेत असताना कोविड विषयक नियमांचे पालन करुनच भाविकांना दर्शन घेता येणार आहे. अन्यथा कारवाई करण्याचा इशारा जिल्हाधिकारी यांनी काढलेल्या आदेशात देण्यात आला आहे.

Corona Impact| कोरोनाचा एसटीला फटका; उत्पन्न घटले

जिल्हाधिकारी यांच्या आदेशानुसार सोमवारी (ता.०५) सकाळी ७ वाजता श्री.वैद्यनाथ मंदिर भाविकांसाठी खुले करण्यात आले. यावेळी भाविकांची उपस्थिती होती. दरम्यान वैद्यनाथ मंदिराचे सचिव राजेश देशमुख यांनी सांगितले की, भाविकांनी राज्य शासनाने दिलेल्या नियमांचे पालन करुनच दर्शनासाठी यावे. दर्शनासाठी आल्यानंतर गर्दी करु नये, योग्य ते अंतर ठेवावे अन्यथा कारवाई ला सामोरे जावे लागेल म्हणून भाविक भक्तांनी सर्व नियमांचे पालन करुनच दर्शन घ्यावे, मंदिर प्रशासनाला सहकार्य करावे असे आवाहन श्री. देशमुख यांनी केले आहे.