Beed Jail : बीडच्या कारागृहातील परिस्थिती! क्षमता १६१ ची अन्‌ कैदी ३४०

बीड - सरपंच संतोष देशमुख हत्या, खंडणी व मकोका गुन्ह्यातील आरोपी वाल्मीक कराड आणि त्याची टोळी, आठवले टोळी, गित्ते टोळीसह आर्थिक गैरव्यवहारातील सुरेश कुटे, बबन शिंदे, सतीश भोसले ऊर्फ खोक्या असे आरोपी बीड जिल्हा कारागृहात असल्याने मागील तीन महिन्यांपासून हे कारागृह चर्चेत आहे.

मात्र, १६१ कैद्यांची क्षमता असलेल्या या कारागृहात सध्या ३४० कैदी आहेत. यातील सात कैदी शिक्षा झालेले तर उर्वरित न्यायाधीन बंदी आहेत. क्षमतेपेक्षा अधिक कैदी असल्याने प्रशासनावर तर ताण आहेच. शिवाय, कैद्यांच्या मानवाधिकारांचीही पायमल्ली होत आहे. जिल्हा कारागृहात आठ बराकी असून एकेका बराकीमध्ये तब्बल ५० कैद्यांना राहावे लागत आहे.

संतोष देशमुख हत्या प्रकरणातील वाल्मीक कराड, सुदर्शन घुले, जयराम चाटे, प्रतीक घुले ही टोळी सध्या जिल्हा कारागृहात आहे. तत्पूर्वीच बापू आंधळे खून प्रकरणातील महादेव गित्ते, राजेश वाघमोडे, मुकुंद गित्ते, राजाभाऊ नेहरकरही याच कारागृहात होते.

गित्ते व कराड एकमेकांचे दुश्‍मन असल्याने सुरक्षेच्या कारणावरून वाल्मीक कराडला इतरत्र हलविण्यासाठी कारागृह प्रशासनाने प्रयत्नही केले. परंतु, या प्रकरणाच्या सुनावण्या वेगवेगळ्या न्यायालयात झाल्याने हा मुद्दा मागे पडला. त्यातच आठवले टोळीवरही गोळीबाराचा गुन्हा नोंद झाला.

अक्षय आठवले, आशिष आठवले, मनीष क्षीरसागर, ओंकार सवाई व धीवार यांची रवानगीही याच कारागृहात झाली. या प्रमुख टोळ्यांतील आरोपींसह क्षमतेपेक्षा दीडपटीहून अधिक कैद्यांना सांभाळताना प्रशासनाच्या नाकी नऊ येत आहेत. सोमवारी सुदीप सोनवणे व राजेश वाघमोडे यांच्यातील भांडणामुळे गित्ते टोळीही हर्सूल कारागृहात हलवण्यात आली आहे. आज आठवले टोळीलाही नाशिकला धाडण्यात आले आहे.

इमारत बांधकामासाठीचे प्रस्ताव शासनाला पाठविले असून त्यासाठी पाठपुरावा सुरु आहे. क्षमतेपेक्षा अधिक कैदी अशी सर्वत्र स्थिती आहे. अंबाजोगाईला नवीन कारागृहाची प्रक्रीया सुरु आहे.

- बक्सर मुलानी, कारागृह अधीक्षक, बीड.