बीडमध्ये शिवसेना राणेंविरोधात आक्रमक; गाढवावरून काढली प्रतिकात्मक पुतळ्याची यात्रा

बीड: मुख्यमंत्री उद्धव ठाकरे यांच्याबद्दल आक्षेपार्ह वक्तव्य केल्याचा आरोप करत शिवसेनेने मंगळवारी (ता. २४) केंद्रीय मंत्री नारायण राणे यांच्या विरोधात आंदोलन केले. परंतु, शहरात आंदोलनादरम्यान शिवसेनेतील फुटीचे दर्शन घडले. एका गटाने जिल्हाधिकारी कार्यालयासमोर तर दुसऱ्या गटाने जिल्हा प्रमुखांच्या कार्यालयासमोर आंदोलन केले. केंद्रीय मंत्री नारायण राणे यांनी जनआशीर्वाद यात्रेदरम्यान मुख्यमंत्री उद्धवजी ठाकरे यांच्याबद्दल आक्षेपार्ह वक्तव्य केले. या विरोधात शिवसेना आक्रमक झाली. गणेश वरेकर, सागर बहिर आदींनी जिल्हाधिकारी कार्यालय परिसरात गाढवावरून प्रतिकात्मक पुतळ्याला चपलेचा हार घालून नगर रोडवरून मिरवणूक काढली. तसेच घोषणाबाजी करत प्रतिमेचे दहन केले. प्रतिमेला चपलांनी मारहाणही करण्यात आली. तर, दुसरे आंदोलन नगर नाका परिसरात झाले.

कोंबड्या उडवून आणि नारायण राणेंना अरबी समुद्रात बुडवा किंवा शिवसैनिकांच्या हवाली करा, अशा घोषणा देत त्यांच्या प्रतिकात्मक पुतळ्याचे दहन करण्यात आले. जिल्हाप्रमुख कुंडलिक खांडे यांनी याबाबत पोलिसांत लेखी तक्रारही दिली आहे. नारायण राणे यांना आग्रा येथील मेंटल हॉस्पिटलमध्ये दाखल करा. नारायण राणेंना अरबी समुद्रात बुडवा किंवा शिवसैनिकांच्या हवाली करा अशा घोषणा यावेळी देण्यात आल्या. परमेश्वर सातपुते, आशिष मस्के, गोरख सिंघन, सुनील सुरवसे, मशरु पठाण, रतन गुजर, कल्याण कवचट, सखाराम देवकर, देवराव घोडके, शिवाजी कोलगंडे, शंकर चव्हाण, राजाभाऊ नवले, रंजीत कदम, संजय उगले, सुमंत रुईकर, नंदु येवले, समीर बेग,अर्जुन नलावडे आदी आंदोलनात सहभागी झाले होते.