शब्द हे साहित्याचे पैंजण

भारतरत्न स्वरसम्राज्ञी लता मंगेशकर साहित्यनगरी उदगीर : आईप्रमाणे साहित्यातून बालकावर संस्कार झाले पाहिजेत. बालकांना घडवण्यासाठी पालकांनी पुढाकार घेतला पाहिजे. माझ्या मुलीने मला बालसाहित्य लिहिण्यास प्रवृत्त केले. शब्द हे साहित्याचे पैंजण आहे. आपल्या मुलांना वाचनाकडे वळवा, त्यांना फुलू द्या कारण ते देशाच्या भविष्य आहेत, असे मत साहित्यिक विलास सिंदगीकर यांनी व्यक्त केले. यावेळी त्यांनी आपली चौथीच्या पाठ्यपुस्तकातील ‘आभाळमाया’ ही कविता सादर करून टाळ्या मिळवल्या. येथील नथमलसेठ इन्नानी सभागृहात आयोजित ‘बालसाहित्यिकांशी संवाद व गप्पा’ या उपक्रमात रविवारी (ता.२४) बालकांनी सहभागी होऊन आनंद घेतला. अध्यक्षस्थानी साहित्यिक बालाजी मदन इंगळे होते. दत्ता डांगे, भगवानराव अंजनीकर, विलास सिंदगीकर सहभागी झाले होते.

यावेळी दत्ता डांगे म्हणाले, की एक कथा २२ लाख देऊ शकते हे अनुभवातून सांगतो. तीन आंधळे आणि एक डोळस ही कथा त्यांनी सादर केली. यात एक खालमान्या, दुसरा वरमान्या तर तिसरा डोळ्यावर पट्टी नांदणारा, चौथा डोळ्याचा उपयोग करणारा. आपल्या दृष्टीचा आपण उपयोग केला पाहिजे. चौफेर पाहिले पाहिजे, कलागुण जोपासले पाहिजेत. माझ्या यशातून हे खरे ठरले आहे. भगवान अंजनीकर म्हणाले, मुलांना संधी देऊन लिहिते केले पाहिजे. आजचे वातावरण चांगले नाही असे म्हणण्यापेक्षा मार्ग काढला पाहिजे. मुलांसंदर्भात उदासीन होऊ नका. बालाजी मदन इंगळे म्हणाले, साहित्य आपल्याला कसं जगायचं हे शिकवतं, आयुष्य समृद्ध करतं. आदर्श नागरिक बनवतं, जी मुले लिहितात त्यांना प्रेरणा द्या. दाद मिळावी म्हणून इतरांचे साहित्य घेऊ नका, ते स्वरचित असावे. मोबाइलपासून मुलांना बाहेर काढून वाचनाकडे वळवा. सूत्रसंचालन कु. श्रेया पुल्लागौर, कु.प्रज्योत चिकले यांनी तर आभार कु.अक्षदा पळनाटे हिने मानले.