Vidhan Sabha 2019 : भाजप सोशल मीडिया टीमविरुद्ध परळीत गुन्हा 

परळी वैजनाथ : विडा येथील कथित व्हायरल क्‍लिपप्रकरणी विरोधी पक्षनेते धनंजय मुंडे यांच्या वतीने वाल्मीक कराड यांनी शनिवारी रात्री उशिरा भाजप सोशल मीडिया टीमविरुद्ध फिर्याद देण्यात आली. त्यानुसार रविवारी (ता. 20) येथील शहर पोलिस ठाण्यात गुन्हा दाखल करण्यात आला आहे. 

निवडणूक प्रचार अंतिम टप्प्यात असताना शनिवारी (ता. 19) राष्ट्रवादी कॉंग्रेसचे उमेदवार धनंजय मुंडे यांच्या गुरुवारी (ता. 17) विडा येथील प्रचारसभेत बोललेल्या वक्तव्याची व्हिडिओ क्‍लिप भाजपच्या सोशल मीडिया टीमकडून व्हायरल करण्यात आली. त्यामध्ये धनंजय मुंडे यांनी बोललेल्या मूळ वक्तव्याला एडिट करून प्रसारमाध्यमामध्ये राष्ट्रवादी कॉंग्रेसचे उमेदवार धनंजय मुंडे यांची बदनामी करण्याच्या उद्देशाने पसरविले.

ही बाब मुंडे यांच्या निवडणुकीवर परिणाम करणारी असल्यामुळे याविरोधात तत्काळ गुन्हा नोंद करून कारवाई करावी, अशी तक्रार राष्ट्रवादी कॉंग्रेसचे वाल्मीक कराड यांनी केली. यानुसार रविवारी येथील शहर पोलिसांनी याप्रकरणी भाजप सोशल मीडिया टीमविरुद्ध गुन्हा दाखल केला आहे.