औरंगाबाद : शिंदे-फडणवीस सरकार बुलेट ट्रेनप्रमाणे काम करीत आहे. यामुळे पाच वर्षांतील कामे दोन वर्षांत पूर्ण होणार आहेत. उद्धव ठाकरे यांच्याविषयी असलेली जनभावना आता कमी झाली आहे. त्यामुळे २०२४ च्या लोकसभा निवडणुकीत भाजप आणि शिंदेगटाचे ४५ खासदार आणि विधानसभेत दोनशेपेक्षा जास्त आमदार निवडून येतील, असा दावा भाजपचे प्रदेशाध्यक्ष चंद्रशेखर बावनकुळे यांनी शुक्रवारी (ता.२३) पत्रकार परिषदेत केला.
संघटनात्मक बैठकीनिमित्ताने बावनकुळे हे औरंगाबादेत आले, असता त्यांना माध्यमांशी संवाद साधला. ते म्हणाले, की महाविकास आघाडीने विदर्भ आणि मराठवाडा वैधानिक विकास महामंडळ बरखास्त केले. १२ आमदारांच्या नियुक्त्यांशी त्यांचा संबंध जोडला. १२ आमदार नियुक्त करा मगच विकास मंडळे पुनरुज्जीवित करतो अशी मागासभागांविरोधी भूमिका घेतल्याची टीकाही बावनकुळे यांनी केली.
आता शिंदे व फडणवीस सरकार बुलेट ट्रेनच्या वेगाने काम करत आहे. २०२४ च्या निवडणुकीत राज्यात सर्व निवडणुकीत ५१ टक्के मते मिळविण्याचे नियोजन आम्ही केले आहे. शेतकऱ्यांना १२ तास वीज मिळावी यासाठी मुख्यमंत्री सौरऊर्जा योजना राज्यभर राबविण्यात येणार आहे. यावेळी सहकारमंत्री अतुल सावे, विक्रांत पाटील, संजय कोडगे, सरचिटणीस संजय केणेकर, भगवान घडामोडे, प्रवीण घुगे, अनिल मकरिये, विजय औताडे उपस्थित होते.
शहांवर आरोप म्हणजे सूर्याला दिवा दाखविणे
जेव्हा महाविकास आघाडी केली तेव्हा निवडणुका घ्या असे ठाकरे म्हणाले नाहीत. आता राज्यात विधानसभा निवडणुका घ्या असे उद्धव ठाकरे यांनी अमित शहा यांना दिलेले आव्हान हे सूर्याला दिवा दाखविण्यासारखे आहे. त्यामुळे उद्धव ठाकरे हे घाबरलेल्या अवस्थेत आहेत. त्यांनी अमित शहा यांच्या दौऱ्याचा धसका घेतला आहे, असा टोलाही त्यांनी लगावला.
शिंदे गटाचे उमेदवारही निवडून आणू
खरी शिवसेना कोणाची याचा वाद न्यायालयात आहे. निकाल विरोधात लागल्यास भाजप निवडणुकीला तयार असेल का असे माध्यमांनी विचारल्यानंतर बावनकुळे म्हणाले, की आम्ही ३६५ दिवस २४ तास निवडणुकीसाठी तयार आहोत. शिंदे गटाचे जेवढे उमेदवार राहतील, त्यांना निवडून आणणार आहे. पंकजा मुडे नाराज नसल्याचेही श्री. बावनकुळे यांनी स्पष्ट केले.
राज ठाकरे दिलदार
राज ठाकरे हे आमचे जुने मित्र आहेत. ते दिलदार आहेत, असे त्यांनी सांगितले. दरम्यान, आमदार प्रशांत बंब यांनी शिक्षकांविषयी घेतलेली भूमिका वैयक्तिक असल्याचेही त्यांनी स्पष्ट केले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.