लग्नाच्या बैठकीतच जोडप्याने म्हटले ‘कबुल हैं’, कोरोनामुळे कुटुंबीयांचा निर्णय

लातूर : लग्न सोहळा म्हटले की काही ठिकाणी शेकड्याच्या तर काही ठिकाणी हजारांच्या घरात गर्दी पहायला मिळते. पण, केवळ 15 जणांच्या उपस्थितीत एक विवाह सोहळा संपन्न झाला. ‘कोरोना’चा प्रार्दुभाव रोखण्यासाठी लातूरातील सय्यद कुटूंबाने हा कौतूकास्पद निर्णय घेतला. तर दुसरीकडे, शहरातील मध्यभागातील अंजनी हॉटेलला नोटीस पाठवून तेथे होणारे दोन विवाह सोहळे पोलिसांनी गुरूवारी रद्द करायला लावले.

कोरोनाचा संसर्ग टाळण्यासाठी गर्दी करू नका, असे आवाहन विविध स्तरातून केले जात आहे. या आवाहनाला सकारात्मक प्रतिसादही मिळताना दिसत आहे. जात-धर्म न पाहता प्रत्येकजन कोरोनाशी मुकाबला करण्यासाठी मानसिकरित्या सज्ज झाला आहे. याच पार्श्वभूमीवर लातूरातील सय्यद कुटुबांना अतिशय साधेपणाने आणि तेही लग्न तारीख ठरविण्याच्या बैठकीतच मुलाचे लग्न लावून देत नवा आदर्श घालून दिला आहे.

मोहम्मद मजहर हूसेन हे उद्योग क्षेत्रात कार्यरत आहेत. त्यांच्या मोहम्मद इक्बाल हुसेन या मुलासाठी त्यांनी अहदमपूरमधील एक स्थळ पाहीले. मुलगी आवडली. त्यानंतर लग्नाची तारीख ठरविण्यासाठी बैठक आयोजित करण्यात आली. या बैठकीत दोन्हीकडील 15 कुटूंबिय आणि नातेवाईक उपस्थित होते. बैठकीत ‘कोरोना’चा विषय निघाला. हा आजार देशात आणि तोही महाराष्ट्रात झपाट्याने पसरत आहे. त्यातील गांभीर्य पाहून सय्यद कुटूबांने बैठकीत निकाह लावण्याचा मुद्दा मांडला. तो सर्वांनाच आवडला. लग्नाची तारीख ठरविण्यासाठी गेलेल्यांनी परत येताना निकाह लावून सोबत वधूलाच आणले. या निर्णयाचे अनेकांनी कौतूक केले. या वेळी लातूर शहर जिल्हा काँग्रेस कमिटीचे अध्यक्ष मोईज शेख, ॲड. झहिरोद्दीन सय्यद, प्रा. फसियोद्दीन सिद्दीकी, माजी उपनगराध्यक्ष कलीम सिद्दीकी उपस्थित होते.

दरम्यान, महाराष्ट्र अंधश्रद्धा निमूर्लन समितीच्या वतीने दोन विवाह सोहळे अंजनी हॉटेलमध्ये आयोजित करण्यात आले होते. हा समारंभ आज (ता. 19) सायंकाळी सहा वाजता आयोजिण्यात आला होता. याबाबत पोलिसांनी माहिती समजताच त्यांनी अंजनी हॉटेलला नोटिस पाठवून गर्दी जमवल्यास कारवाई होईल, असे सांगितले. याला शिवाजी नगर पोलिस स्टेशनचे पोलिस निरिक्षक एन. व्ही. लाकाळ यांनी दुजोरा दिला. पोलिसांच्या नोटीसीनंतर हे विवाह सोहळे पुढे ढकलण्यात आले.
---