Corona Updates: मराठवाड्यात २४ तासांत ३६५ जणांना कोरोनाची बाधा

औरंगाबाद: मराठवाड्यात मंगळवारी (ता. २२) दिवसभरात ३६५ कोरोनाबाधित आढळले. जिल्हानिहाय रुग्णसंख्येत बीड १४७, औरंगाबाद ७७, उस्मानाबाद ५०, लातूर ३३, परभणी २४, नांदेड १५, जालना १४, हिंगोली ५ जणांचा समावेश आहे. आणखी सोळा जणांचा उपचारादरम्यान मृत्यू झाला. त्यात औरंगाबादेत आठ, जालना-लातूर-नांदेड-बीडमधील प्रत्येकी दोघांचा समावेश आहे.

औरंगाबाद जिल्ह्यात नव्याने ७७ रुग्ण आढळले. रुग्णांची संख्या १ लाख ४५ हजार ६०७ झाली असून बरे झालेल्या आणखी १२१ जणांना सुटी देण्यात आली. आजपर्यंत १ लाख ४१ हजार २६७ रुग्ण बरे झाले आहेत. ९४१ जणांवर उपचार सुरू आहेत. आणखी आठ जणांचा मृत्यू झाला. त्यात घाटी रुग्णालयात पाच, जिल्हा रुग्णालयात एक तर खासगी रुग्णालयातील दोघांचा समावेश आहे. आतापर्यंत ३ हजार ३९९ जणांचा कोरोनाने बळी घेतला आहे.

जालन्यात दोघांचा मृत्यू-
जालना जिल्ह्यात कोरोनाने आणखी दोघांचा मृत्यू झाला. आतापर्यंत एक हजार १३९ जणांचा मृत्यू झाला आहे. नव्या १४ रुग्णांची भर पडली. रुग्णसंख्या ६१ हजार ४९ वर पोचली असून आणखी २० रुग्ण बरे झाले. आतापर्यंत ५९ हजार ६३१ रुग्ण उपचारानंतर कोरोनामुक्त झाले आहेत. सध्या २७९ जणांवर उपचार सुरू आहेत.