Akhada Balapur : बेपत्ता बालकांचे नदीच्या पाण्यात एकमेकांच्या हातात हात धरलेले मृतदेह सापडले

आखाडा बाळापूर - कळमनुरी तालुक्यातील शेवाळा येथील दोन सख्खे चुलत भाऊ चार ते पाच वयोगटातील शुक्रवार (ता. २०) सकाळपासून खेळत असताना अचानक बेपत्ता झाल्याने गावात एकच खळबळ उडाली. दिवसभर गावकऱ्याचा शोध घेतला, मात्र ते सापडले नाही. सायंकाळी गावालगत असलेल्या कयाधु नदीच्या पात्रामध्ये दोन्ही चिमकल्यांचे एकमेकांच्या हातात हात धरलेले अवस्थेत मृतदेह सापडल्याने गावावर शोककळा पसरली आहे.

याबाबत घटनास्थळावर मिळालेल्या माहितीनुसार, आखाडा बाळापूरपासून जवळ असलेल्या शेवाळ या गावांमध्ये शुक्रवारी सकाळी ११ वाजता स्वराज दीपक सूर्यवंशी व शिवराज संदीप सूर्यवंशी हे दोन लहान सख्खे चुलत भाऊ वय चार ते पाच वयोगटातील चिमुकले शुक्रवारी सकाळी अकरा वाजल्यापासून घरासमोर खेळत असताना बेपत्ता झाले होते.

यानंतर घरच्यानी आजूबाजूला खूप शोधण्याचे शोधून पाहिले. परंतु दोन्ही मुले सापडत नसल्याने सदर बातमी गावात पसरून सर्व गावकऱ्यांच्या वतीने गावात सर्वच ठिकाणी दोन मुलांना शोधण्याचे काम सुरू केले होते.

रात्री उशिरा गावाजवळ असलेल्या नदीमध्ये दोन्ही मुलांचे एकमेकांच्या हातात हात घालून सोबत असलेल्या अवस्थेत मृतदेह सापडल्याने कुटुंबियावर दुःखाचा डोंगर कोसळला आहे. उपस्थित सर्व सर्वांच्या डोळ्यात पाणी आले होते, शेवाळा गावावर शोककळा पसरुन एकही घरी चुल पेटली नाही.