Beed News : तालुक्यात विकास गंगा घेऊन येणार ; धनंजय मुंडे : पंचायत समितीच्या इमारतीचे लोकार्पण

शिरूर कासार : गोपीनाथ मुंडे यांचे सर्वांगीण विकासात्मक स्वप्न पूर्ण करण्याचे पालकत्व मी घेतले आहे, असे प्रतिपादन पालकमंत्री धनंजय मुंडे यांनी केले.

शिरूर कासार येथील पंचायत समितीच्या इमारतीचे लोकार्पण मंगळवारी (ता.२३) झाले. यावेळी ते बोलत होते. व्यासपीठावर आमदार बाळासाहेब आजबे, अविनाश पाठक, रामकृष्ण बांगर, शिवाजी राऊत, दशरथ वनवे, गहिनीनाथ सिरसाट, विश्वास नागरगोजे, दिलीप घुंबरे, नवनाथ ढाकणे, बाळासाहेब केदार, बाबूराव केदार, सतीश शिंदे, महेश ढाकणे, प्रियंका केदार, डॉ. आर. एस. बडजाते, आक्षय जाधव, मदन मस्के, यसिन शेख, तहसीलदार बिपिन पाटील, गटविकास अधिकारी संजय केंद्रे उपस्थित होते.

प्रास्ताविक मुख्य कार्यकारी अधिकारी अविनाश पाठक यांनी केले.

पंचायत समितीच्या इमारतीचे लोकार्पण झाल्यानंतर तालुक्यातील विविध विभागांच्या कार्यालयाचे ५६ कोटी ६६ लाख व तालुक्यातील काही रस्त्यांचा शुभारंभ करण्यात आला. तालुक्याचे आणि मुंडे कुटुंबाचे नाते जिव्हाळ्याचे आहे. तालुक्यात विकास गंगा घेऊन येणार असून, ऊसतोड मजूर पश्चिम महाराष्ट्र ऊस तोडणीसाठी जात आहेत.

येत्या सहा वर्षांत ऊसतोड मजुरांना ऊस उत्पादन करण्यासाठी सिंचनाचे साधने निर्माण करणार असून, तालुक्याचा मागासलेला डाग काढून तालुका सुजलाम् सुजलाम् होईल, असे आश्वासनही त्यांनी दिले. यावेळी धनंजय मुंडे यांचे भव्यदिव्य स्वागत करण्यात आले. ठिकठिकाणी जेसीबींमधून त्यांच्यावर फुलांची उधळण करण्यात आली. हिवरसिंग, खोकरमोह, रायमोह, पाडळी, आनंद गाव येथेही जंगी स्वागत करण्यात आले.

दरम्यान, महसुल प्रशासन अधिकारी- कर्मचाऱ्यांसाठी निवासस्थाने, दुय्यम निबंधक कार्यालयात इमारत, तालुका कृषी कार्यालय इमारत, ऊसतोड मजुरांच्या मुलांसाठी भगवान बाबा शासकीय वसतिगृह, औद्योगिक प्रशिक्षण संस्था, कार्यालय व वसतिगृह, ग्रामीण रूग्णालय इमारत कामाचे भूमिपूजनही झाले.