औरंगाबादच्या डॉ. पळसकर यांनी बनवले सेंट्रिक जॉ रिलेशन उपकरण 

औरंगाबाद - कृत्रिम, वेड्यावाकड्या दातांची सांगड योग्यरीतीने घालण्यासाठी, जबड्याखालील वेदनेवर मात करण्याकरिता डॉ. जयंत पळसकर यांनी सेंट्रिक जॉ रिलेशनमधील उपकरण तयार केले आहे. त्याला दंतशास्त्रातील अमेरिकन, युरोपियन पेटंट मिळाले आहे. दंतशास्त्रात असे पेटंट मिळवणारे ते पहिले भारतीय ठरले आहेत. भारत सरकारने तातडीने दखल घेत या उपकरणाच्या निर्मितीसाठी 50 लाखांच्या अनुदानाला मंजुरी दिली आहे. 

दंतशास्त्रातील सेंट्रिक जॉ रिलेशन हा विषय गेल्या 100 पेक्षा अधिक वर्षांहून वादाचा ठरला आहे; परंतु या उपकरणाच्या शोधामुळे त्या वादावर कायमचा पडदा पडणार आहे. दंतशास्त्रात अमेरिकन, युरोपिअन पेटंट मिळणारे भारताचे पहिले उपकरण असल्याचा दावा डॉ. पळसकर यांनी केला आहे. ते पुणे येथील सिंहगड दंत महाविद्यालयातील कृत्रिम दंतशास्त्र विभागप्रमुख असून, मूळचे औरंगाबादकर आहेत. 

नाशिकच्या आरोग्य विज्ञान विद्यापीठाच्या दंत शाखेचे डॉ. पळसकर सध्या अधिष्ठाता आहेत. तसेच राष्ट्रीय, आंतरराष्ट्रीय विविध नियतकालिकांच्या संपादक मंडळावर कार्यरत असून, काही नियतकालिकांचे मुख्य संपादक म्हणूनही काम पाहत आहेत.