भोकरदन तालुक्यात विजेचा शॉक लागल्याने तरुणाचा जागीच मृत्यू

भोकरदन (जि.जालना) : घराजवळील विद्युत खांबाला (Electric Shock) लावलेल्या लोखंडी ताराच्या ताणात पावसामुळे विद्युत प्रवाह उतरला होता. या ताराला स्पर्श झाल्यामुळे विजेचा जोरदार धक्का लागल्याने भोकरदन (Bhokardan) तालुक्यातील पेरजापूर येथील तरुणाचा जागीच दुर्दैवी मृत्यू झाला. ही घटना शनिवारी (ता.18) सकाळी सात वाजेच्या सुमारास घडली. भागवत नामदेव जाधव (वय 25) असे या घटनेत मृत झालेल्या तरुणाचे नाव आहे. मिळालेल्या माहितीनुसार भोकरदन तालुक्यातील (Jalna) पेरजापूर येथील भागवत जाधव हा कुटुंबियांसह गावात राहतो. शुक्रवारी (ता.17) तालुक्यातील काही भागात जोरदार पाऊस झाल्याने अनेक भागातील वीजपुरवठा खंडित झाला होता.

भागवत याच्या घरातील वीजपुरवठा देखील खंडित झाल्यामुळे घराजवळ असलेल्या विद्युत खांबावरून आलेले विजेच्या तारात काही अडचण आहे का हे पाहण्यासाठी भागवत हा शनिवारी सकाळी विद्युत खांबाजावळ गेला. यावेळी खांबाला ताण म्हणून लावलेल्या लोखंडी तारात पावसाच्या पाण्यामुळे विद्युत प्रवाह उतरला होता. या ताणाला त्याचा स्पर्श झाल्याने त्याला विजेचा जोरदार शॉक लागला. आजूबाजूला असलेल्या ग्रामस्थांच्या हे लक्षात आल्याने त्याला तातडीने जखमी अवस्थेत भोकरदन ग्रामीण रुग्णालयात दाखल केले. मात्र, येथे तपासून त्याला मृत घोषित करण्यात आले. ग्रामीण रुग्णालयात उत्तरीय तपासणी करून दुपारी एक वाजता पेरजापूर येथे शोकाकुल वातावरणात अंत्यसंस्कार करण्यात आल्याचे नातेवाईकांनी सांगितले.