जालना - कोरोना विषाणूचा संसर्ग टाळण्यासाठी आरोग्य विभागाकडून सॅनिटायझरने हात स्वच्छ करण्याचा सल्ला दिला जात आहे. त्यामुळे बनावट सॅनिटायझर विक्रीचे प्रकारही उघड होत आहेत. जालन्यातील एका दुकानावर गुरुवारी (ता.१९) पोलिस, अन्न व औषध प्रशासनाने व तहसील कार्यालयाच्या पथकाने छापा टाकून सुमारे सहा लाख रुपयांचे बनावट सॅनिटायझर जप्त केले आहे.
जालना शहरात आनंद बंब यांच्या कल्पना एम्पोरियम होलसेल शॉपमध्ये बनावट सॅनिटायझरचा साठा असल्याची माहिती पोलिस प्रशासनाला मिळाली. त्यानुसार पोलिस प्रशासन, तहसील प्रशासन व अन्न व औषध प्रशासनाच्या पथकाने कल्पना एम्पोरियमवर गुरुवारी (ता.१९) सायंकाळी छापा टाकून झाडझडती घेतली. या छाप्यादरम्यान सुमारे सहा लाख रुपयांचे बनावट सॅनिटायझरचा साठा जप्त करण्यात आला आहे.
हेही वाचा : हुश्श ऽऽऽ कोरोनाचे तीनही संशयित निगेटिव्ह
ही कारवाई वरिष्ठांच्या मार्गदर्शनाखाली तहसीलदार श्रीकांत भुजबळ, उपविभागीय पोलिस अधिकारी सुधीर खिरडकर, स्थानिक गुन्हे शाखेचे पोलिस निरीक्षक राजेंद्रसिंह गौर, सदर बाजार पोलिस ठाण्याचे पोलिस निरीक्षक संजय देशमुख यांच्यासह पोलिस कर्मचारी, अन्न व औषध अधिकारी, कर्मचारी आदींनी केली आहे.
हेही वाचा : परदेशातून आलेल्या डॉक्टरला नोटीस
याप्रकरणी शॉपचे मालक संशयित आनंद बंब याला ताब्यात घेतल्याची माहिती स्थानिक गुन्हे शाखेचे पोलिस निरीक्षक राजेंद्रसिंह गौर यांनी दिली. दरम्यान, याप्रकरणी रात्री उशिरापर्यंत सदर बाजार पोलिस ठाण्यात गुन्हा दाखल करण्याची प्रक्रिया सुरू होती.
कोरोनाचा संसर्ग टाळण्यासाठी नागरिक मोठ्या प्रमाणावर सॅनिटायझरने हात स्वच्छ करीत आहेत. वाढती मागणी लक्षात घेता या दुकानात बनावट सॅनिटायझरचा मोठ्या प्रमाणावर साठा करण्यात आला होता. तीन विभागाच्या पथकाला हा साठा मोजण्यासाठी तब्बल पाच तासांपेक्षा अधिक वेळ लागला.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.