औसा - औसा शहरात भरवस्तीत असलेल्या एका गोदामाला आग लागून गोदामात ठेवलेले नळजोडणी साहित्य व इतर समान जाळून खाक झाल्याची घटना मंगळवारी (ता. १) रोजी दुपारी साडे बारा वाजण्याच्या सुमारास घडली.
औसा-निलंगा रोडवरील केदारनाथ मंगल कार्यालयाच्या पाठीमागे असलेल्या या गोदामाला आग लागल्याने गोदामच्या बाजूला असलेल्या घराचेही या आगीत नुकसान झाले आहे. जवळपास अडीच ते तीन कोटी रुपयांचे नुकसान झाल्याचा प्राथमिक अंदाज व्यक्त करण्यात येत आहे. सुदैवाने या आगीत कोणतीही जीवितहानी झाली नाही.
येथील केदारनाथ मंगल कार्यालयाच्या पाठीमागे एक पत्र्याचे प्रगती कन्स्ट्रक्शन कंपनीचे गोडाऊन आहे. या कंपनीला औसा शहरात वाढीव पाणी पुरवठा योजनेचे कंत्राट मिळाले असल्याने नळजोडणीचे महागडे साहित्य यामध्ये ठेवले होते. यामध्ये एचडीपी पाईप, मीटर व नळाला जोडण्यासाठी लागणारे साहित्य ठेवले होते.
मंगळवारी (ता. १) रोजी दुपारी बारा ते साडेबारा वाजण्याच्या सुमारास गोदामाला अचानक आग लागली. धुराचे लोट आणि आगीच्या ज्वाळानी उग्ररुप धारण करीत संपूर्ण गोदाम आगीच्या तावडीत सापडले. गोदामाला खेटून एक घर आहे. या घरातील लोकांनी वेळीच बाहेर निघून सुरक्षित स्थान गाठल्याने जीवित हानी झाली नाही.
सर्व साहित्य पीव्हीसी आणि एचडीपी असल्याने आग झपाट्याने वाढतच गेली. पालिकेचे मुख्याधिकारी मंगेश शिंदे यांनी तात्काळ औसा पालिकेच्या दोन गाड्या घटनास्थळी पाठीवल्या मात्र आग आटोक्यात येत नसल्याने त्यांनी निलंगा आणि लातूर महानगर पालिकेच्या अग्निशमन दलाच्या गाड्या बोलविल्या. औसा पालिकेच्या दोन गाड्यानी दोन फेऱ्या केल्या तरी आग आटोक्यात येत नव्हती.
शेवटी लातूर, निलंगा व औसा आशा चार बंबानी पाण्याचा मारा केल्यावर ही आग विझवण्यात यश आले. आगीचे कारण मात्र कळू शकले नाही. औसा पोलीस ठाण्याचे पोलीस निरीक्षक सुनील रेजितवाड यांनी पोलिसांना घेऊन परिस्थिती नियंत्रणात आणली. बातमी लिहिपर्यंत औसा पोलिसात कोणतीही तक्रार आलेली नव्हती.
'या अचानक लागलेल्या आगीत पालिकेच्या पाणीपुरवठा योजनेचे अडीच ते तीन कोटी रुपयांच्या साहित्याचे नुकसान झाल्याचा अंदाज आहे. यामध्ये मीटर, पाऊण इंची पाईप व जोडणी साहित्य भस्मसात झाले.'
- गोविंदराव माकणे. प्रगती कन्स्ट्रक्शन
या लागलेल्या आगीत माझे पंधरा ते वीस लाख रुपयांचे नुकसान झाले आहे. गोदामाचे पत्रे पूर्ण जाळून गेले आहेत. या गोदामात ठेवलेले माझे साहित्य पण जाळले आहे. गोदामाला खेटून असलेल्या घराच्या खिडक्यांच्या काचा, चौकटीचे नुकसान झाले आहे.'
- वीरभद्र कल्याणी गोदाम मालक
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.