Beed News : अंबाजोगाई येथील बंद झालेल्या दूरदर्शन केंद्राच्या जागी आकाशवाणीच्या एफएम केंद्राला अखेर मुहूर्त

अंबाजोगाई : अंबाजोगाई येथील बंद झालेल्या उच्च शक्ती दूरदर्शन केंद्राच्या जागी आकाशवाणीच्या एफएम केंद्राला अखेर मुहूर्त लागले. शुक्रवारी (ता.१९) पंतप्रधान नरेंद्र मोदी यांच्या हस्ते व्हिडिओ कॉन्फरन्सच्या माध्यमातून याची पायाभरणी झाली.

पिंपळा धायगुडा (ता. अंबाजोगाई) येथील दूरदर्शन केंद्राच्या जागेतच हे आकाशवाणी एफएम प्रसारण केंद्र येथे सुरू होत आहे. पंतप्रधान नरेंद्र मोदी यांनी दूरदृश्य प्रणालीद्वारे या आकाशवाणी ‘एफएम’ प्रसारण केंद्राची पायाभरणी केली. या केंद्राच्या पायाभरणी कार्यक्रमास दूरदृश्य प्रणालीद्वारे केंद्रीय मंत्री अनुराग ठाकूर, डॉ. एल. मुरगम यांची उपस्थिती होती. प्रत्यक्ष मुख्य केंद्राच्या ठिकाणी आमदार नमिता मुंदडा यांच्या हस्ते कोनशिलाचे अनावरण झाले. अपर पोलिस अधीक्षक चेतना तिडके, पुणे येथील आकाशवाणीचे उपसंचालक अनिल पाटील, सहायक अभियंता सुरेश बोचरे, मनोज शहा, अनंतकुमार कोदंडे, बीडचे विजय डंबरे, गोपाळ ठाकूर, लक्ष्मीकांत भालेराव यांची उपस्थिती होती.

हे ‘एफएम’ केंद्र १० किलो वॅटचे असून, ते जवळपास ५० ते ७० किलोमीटर अंतरापर्यंत प्रक्षेपणाची सेवा पुरवणार आहे. येत्या काही महिन्यांत याचे प्रसारण सुरू होणार आहे. एक वर्षापूर्वी हे केंद्र मंजूरही झाले होते. मात्र त्याचे काम सुरू झाले नव्हते. तत्कालीन अधिकारी श्री. चापोलीकर यांनी याचा प्रस्ताव पाठविला होता. परळी येथील सामाजिक कार्यक्षेत्र चेतन सौंदळे यांनी या मागणीसाठी उपोषणही केले होते. खासदार प्रीतम मुंडे यांनीही यासाठी पाठपुरावा केला होता.

गंगाखेड ते किनगाव महामार्गाला मंजुरी

गंगाखेड : तालुक्यातील गंगाखेड, इसाद, सुप्पा, पिंपळदरी मार्गे किनगाव हा रस्ता अतिशय महत्त्वाचा आहे. सदरील रस्ता दोन जिल्ह्यांना जोडतो. या राज्यमार्गाला राष्ट्रीय महामार्गाचा दर्जा प्राप्त होऊन यासाठी १६२ कोटी रुपयांचा निधी मंजूर करण्यात आला आहे.