एक घास मुक्या जीवांसाठी ! उदगीर नगर परिषदेच्या मुख्याधिकाऱ्यांचा उपक्रम

उदगीर (जि.लातूर) ः देशभर टाळेबंदीमुळे अनेक सामाजिक संघटना, राजकीय पुढारी अन्नदान करीत आहेत. कोरोना विषाणुचा प्रादुर्भाव होऊ नये म्हणुन प्रशासन अहोरात्र परिश्रम घेत आहेत. नगर परिषदेचे मुख्याधिकारी भारत राठोड यांनी एक घास मुक्या जनावरासाठी ही अभिनव कल्पना राबवित ज्यांचे कोणाचे लक्षच नव्हते त्या प्रश्नाकडे लक्ष वेधले आहे. शहरातील अनेक भागात भटकी कुत्री, डुकर , बेवारस जनावरे , देवाला सोडलेल्या गायी या टाळेबंदीमुळे शहरातील बाजारपेठा, हॉटेल बंद असल्यामुळे अन्न पाण्यावाचून उपासमार होत आहे.

त्यांची उपासमार होत आहे. अशा मुक्या जनावरांना चारा मिळावा म्हणून शहरातील नागरिकांना घरातील शिल्लक राहिलेल्या भाकरी, चपाती खाण्यायोग्य असलेले अन्न नगर परिषदेच्या घंटागाडी स्वच्छता कर्मचाऱ्यांमार्फत देण्यात यावे. एकल जमलेल अन्न शहरातील जनावरांना खाऊ घालण्यात येणार असल्याच आवाहन नागरिकांना करण्यात आले आहे.

वाचा ः मधुमेह असतानाही केली ‘कोरोना’वर मात, आता ‘ग्रीन झोन’मध्ये लातूर

आपल्या शहरातील मुक्या जनावरांना आपल्या घासातील एक घास द्यावे, त्यांना आपल्या अन्नाची गरज आहे! प्राण्यांना आपलाच आधार आहे. आपण सर्व मिळुन मदत करु या, असे सोशल मीडियाच्या माध्यमातुन आवाहन करण्यात आला आहे. त्यामुळे माणसाबरोबर मुक्या प्राण्याच्या तहान भुक भागणार आहे. नगरपरिषदेच्या या अभिनव उपक्रमाचा नागरिकांमधून कैतुक होत आहे.

हेही वाचा ः उदगीर शहरात मास्क न घालणाऱ्या साडेपाचशे जणांवर दंडात्मक कारवाई

शहरातील आपापल्या घरासमोर भांड्यांत पशुपक्ष्यांना पाणी पिण्यासाठी ठेवावे. जेणे करुन त्यांची तहान भागेल आणि मुक्या जनावरांसाठी घरातील शिल्लक असलेले अन्न देऊन नागरिकांनी सहकार्य करावे. त्यामुळे शहरातील जनावरे उपाशी राहणार नाहीत.
भरत राठोड, मुख्याधिकारी, नगरपरिषद , उदगीर

उदगीरचे सामान्य रुग्णालय आता कोविड रुग्णालय
उदगीर येथील सामान्य रुग्णालय हे कोविड रुग्णांसाठी तपासणी आणि उपचारासाठी तयार करण्यात आले आहे. त्यामुळे शनिवारपासून (ता.१८) बाह्यरुग्ण तपासणी अर्थात ओपीडी आणि शत्रक्रिया या देगलूर मार्गावरील धन्वंतरी आयुर्वेद महाविद्यालयात स्थलांतरित करण्यात आल्या आहेत. कोविड-१९ या आजाराच्या पार्श्वभूमीवर आपत्ती व्यवस्थापन अंतर्गत जिल्हा प्रशासन व आरोग्य विभागाच्या सूचनेप्रमाणे सामान्य रुग्णालय उदगीर येथील सर्व दैनंदिन रुग्णसेवेचे स्थलांतर धन्वंतरी आयुर्वेद मेडिकल अॅण्ड चॅरिटेबल हॉस्पिटल येथे करण्यात आले आहे.

रुग्णांना त्वरित सेवा व उपचार मिळावे याकरिता आवश्यक त्या सर्व सोयी-सुविधा सामान्य रुग्णालय व धन्वंतरी आयुर्वेद महाविद्यालयाच्या डॉक्टरांच्या माध्यमातून आणि निमवैद्यकीय, तंत्रज्ञ अन्य सहायकांच्या सहकार्याने रुग्णांसाठी उपलब्ध करून देण्यात आलेल्या आले आहेत. यासंबंधी काही माहिती अपेक्षित असल्यास सामान्य रुग्णालय किंवा धन्वंतरी आयुर्वेद महाविद्यालयाच्या अधिकारी व कर्मचारी यांच्याशी संपर्क करावा असे आवाहन सामान्य रुग्णालयाचे वैद्यकीय अधीक्षक डॉ. दत्तात्रय व्ही.पवार, अतिरिक्त जिल्हा शल्यचिकित्सक डॉ.शशिकांत एस.देशपांडे, महाविद्यालयाचे प्राचार्य डॉ. दत्तात्रय पाटील यांनी केले आहे.