बीड जिल्ह्यात चौघे ठार, असे घडले अपघात....

बीड -  तीन वेगवेगळ्या अपघातात चार जण ठार झाल्याच्या घटना बीड जिल्ह्यात बुधवारी (ता. आठ) घडल्या. एक अपघात बीडजवळील चऱ्हाटा फाटा, दुसरा याच तालुक्‍यातील मैंदाजवळ रात्री उशिरा झाला. तिसरा अपघात कारी फाटा (ता. धारूर) येथे घडला. राजेंद्र वसंत घुमरे (वय 29, रा. गाढेपिंपळगाव, ता. परळी), कुंडलिक सदाशिव होके (वय 28, रा. केज), गोरख आबासाहेब मदने (रा. 20, कारी, ता. धारूर) व अमोल उजगरे (रा. वडवणी) अशी मृतांची नावे आहेत.

राजेंद्र घुमरे व कुंडलिक होके हे दुचाकीवरून जात असताना शहराजवळील नगर रोडवरील चऱ्हाटा फाटा येथे त्यांच्या दुचाकी (एमएच-43 टी-4542) व बसची (एमएच- 40 एन-9176) समोरासमोर जोराची धडक झाली. यात राजेंद्र घुमरे व कुंडलिक होके हे दोघे जागीच ठार झाले. दुसरा अपघात बीड तालुक्‍यातील मैंदाजवळ रात्री उशिरा झाला. यात अमोल उजगरे यांचा मृत्यू झाला.

तिसरा अपघात धारूर तालुक्‍यातील कारी फाट्यावर झाला. कारी (ता. धारूर) येथील गोरख आबासाहेब मदने कामानिमित्त तेलगाव येथे आले होते. काम आटोपून ते रिक्षाने परत गावी निघाले. कारी फाट्यापासून पुढे थोड्या अंतरावर रिक्षातून उतरून चालकाला पैसे देत असताना भरधाव येणाऱ्या कारने (एमएच-13 सीएस) जोराची धडक दिली. यात आबासाहेब मदने गंभीर जखमी झाले. बीडच्या जिल्हा रुग्णालयात नेत असताना वाटेतच त्यांचा मृत्यू झाला. गोरख मदने यांच्यामागे आई-वडील व एक भाऊ असा परिवार आहे.