शेतात गांजा लावू द्या, अडचणीत सापडलेल्या शेतकऱ्याचे मुख्यमंत्र्यांकडे मागणी

देवणी (जि.लातूर) ः हाताला काम नाही, अल्पशा शेतीत बदलत्या अर्थव्यवस्थेमध्ये जीवन जगणे कठीण झाले आहे. धनेगाव प्रकल्पात दीड दशकापूर्वी एक हेक्टर शेती गेली अन् त्याचा मोबादला अद्यापही मिळाला नाही. या उद्वेग्नतेतुन दारुच्या दुकानातून अर्थव्यवस्थेला हातभार लागत असेल तर शेतकऱ्याला शेतात गांजा लावण्याची परवानगी देण्याची मागणी तालुक्यातील एका तरुण व अविवाहित तरुणाने थेट मुख्यमंत्री उद्धव ठाकरे यांच्याकडे निवेदनाद्वारे केली आहे.

धनेगाव (ता.देवणी) मांजराकाठचे समृद्ध गाव. धनेगाव बँरेजमुळे गावाची ओळख जिल्ह्यासह सर्वच भागात झाली. याच गावातील जयंत धोंडीराम पाटील यांची दीड दशकापूर्वी धनेगाव बँरेजमध्ये शेती गेली आहे. अद्यापही त्यांना मावेजाची प्रतीक्षाच करावी लागत आहे. शिल्लक एक हेक्टर क्षेत्रातुन कुटुंबाचा उदरनिर्वाह करणे कठीण. त्यातच गेल्या दोन महिन्यापासुन सुरु असलेल्या टाळेबंदीमुळे सर्वच व्यवहार ठप्प आहेत. त्यातुन अडचणीत मोठी वाढ झाली आहे. या संतापातून त्यांनी गांजा लागवडीची परवानगी मागितली आहे.

लातुरात आता ठराविक दिवशीच उघडणार दुकाने, जिल्हाधिकाऱ्यांचे आदेश

सध्या कोरोनाच्या महामारीतुन हजारो लोक मृत्यूमुखी पडत आहेत. दारु दुकाने उघडी ठेऊन संरक्षित अंतर राखण्याचे व नियमाचा फज्जा उडाला. दारुने शासनाच्या तिजोरीला हातभार लागणार असेल तर मग गांजा लागवडीस परवानगी दिल्यास शासनाच्या महसुलात वाढही होईन आणि शेतकऱ्यांची आर्थिक स्थिती सुधारण्यास मदत होईल. गेल्या पाच वर्षांपासुन तालुक्यासह सीमाभागात दुष्काळसदृश्‍य स्थिती आहे. त्यामुळे शेतीत केलेला खर्चही भरुन निघत नसल्याची स्थिती आहे. शेतकऱ्यांना गांजा लागवडीची परवानगी दिली तर शेतीच्या उत्पन्नातही वाढ होईल व शासनाचा महसुलही वाढण्यास मदत होईल अशी मागणी जंयत पाटील यांनी निवेदनाद्वारे केली आहे.

कुस्तीगिरांच्या ‘शड्डू’चा आवाज ओझ्याखाली, महाराष्ट्र केसरी उपविजेत्याची खंत

गांजाचा वापर भारतीय उपखंडात चार हजार वर्षापासुन होत आहे. शिवाय गांजा या वनस्पतीस आयुर्वेदिक महत्त्व आहे. पुराण काळात याचा उल्लेखही आढळतो. उत्तर भारतात छुप्या पद्धतीने गांजाची लागवड व व्यसनासाठी मोठ्या प्रमाणात वापर होतो. एक एकर गांजाची लागवड केल्यास त्यातुन एक टन जरी उत्पादन झाले तरी सध्याच्या जागतिक बाजारपेठेत त्याची किंमत दोन कोटी रुपये आहे. १९८५ पूर्वी गांजाची लागवड आपल्याकडे सुरु होती. मात्र त्यानंतर कायद्याच्या चौकटीत आणुन त्यावर बंदी आणण्यात आली आहे.
- जंयत पाटील, धनेगाव