९० दिवसांत नऊ हजारांवर ‘गूड न्युज’ !

परभणी  : लॉकडाउनमुळे सर्वत्र हाहाकार उडाला असल्याने सर्वच घटकाला त्याची झळ बसली असताना एक सुखद धक्का मातृत्वाची ओढ असणाऱ्या महिलांना बसला आहे. लॉकडाउन होण्याआधीच्या काळापेक्षी लॉकडाउनमध्ये गरोदर मातांची नोंदणी कमालीची वाढली आहे. तब्बल नऊ हजार ७१८ गरोदर मातांची नोंदणी मार्च ते मे महिन्यात झाली असून पाच हजार ६५२ प्रसूतीदेखील याच कालावधीत झाल्या आहेत.

कोरोनाचा संसर्ग वाढल्याने मार्च महिन्यात लॉकडाउन सुरू झाल्याने तब्बल तीन महिने सर्व व्यवहार बंद होते. अत्यावश्यक सेवा वगळता अन्य कार्यालय, अस्थापना बंद राहिल्याने कुटुंबासोबत वेळ घालवण्यासाठी वेळच वेळ मिळाला. लॉकडाउनचे अनेक नफे-तोटे समोर येत आहेत. अनेक दिवसांपासून कुटुंबापासून, गावापासून दूर झालेली माणस एकत्र आली. नात्यातील जिव्हाळा वाढला, खर्च कमी झाला. आरोग्य सुधारले. कुणाच्या घरात कौटुंबिक नाते घट्ट झाले, तर कुणाच्या घरात चिडचिडपणा वाढून लहानसहान गोष्टीवरून कुरबुऱ्या वाढल्या होत्या. तर कुणामध्ये प्रेमाचा उमाळा दाटून आला.

हेही वाचा व पहा : Video : पिककर्जाच्या मागणीसाठी भाजपचे आंदोलन
 

चार हजार ८३८ मातांची प्रसूती

लॉकडाउन काळातदेखील आरोग्य विभागाचे लसीकरण, गरोदर मातांच्या नोंदी घेण्याचे काम सुरू होते. या दरम्यान, घेतलेल्या नोंदीत लॉकडाउन काळात मार्च ते मे महिन्यात महिलांत गरोदर राहण्याचे प्रमाण वाढल्याचे दिसून आले आहे. तीन महिन्यांत तब्बल नऊ हजार ७१८ महिलांनी गरोदर असल्याची नोंद केली आहे. गरोदर मातांसोबतच लॉकडाउनमध्ये प्रसूती झालेल्या महिलांची संख्यादेखील मोठी आहे. तीन महिन्यांत पाच हजार ६५२ महिलांची प्रसूती झाली आहे. या बाबत आरोग्य विभागाकडून माहिती देण्यात आली आहे. जानेवारी आणि फेब्रुवारी महिन्यात सहा हजार ४७७  गरोदर मातांची नोंदणी झाली होती. तर चार हजार ८३८ मातांची प्रसूती झाली आहे.

लसीकरणात खंड नाही
गरोदर माता आणि लहान बालकांच्या लसीकरणात लॉकडाउनमध्ये कोणताही खंड पडू न देता आरोग्य कर्मचाऱ्यांनी सेवा बजावली आहे. मार्च महिन्यात १८ हजार ९००, एप्रिल-१७ हजार ३५३, मे महिन्यात १९ हजार १८७ असे लसीकरण झाले आहे. आरोग्य विभागातील डॉक्टर, परिचारिकांनी कमालीचे धैर्य दाखवत सेवा बजावली आहे.

हेही वाचा : शेतकऱ्यांची फसवणूक;  बियाने उगवलेच नाही !
 

मार्च ते मेमधील नोंदणी व प्रसूती

तालुका    गरोदर माता नोंदणी        प्रसूती
गंगाखे़ड -   १,१३८                  ५१२
जिंतूर  -   १,७४२                    ८३८
मानवत -  ५२४                      १९०
पालम -  ५०५                         १९०
परभणी-  २,९०८                    २,७१३
पाथरी -  ८४०                       ३७१
पूर्णा -    ८७९                        २६०
सेलू   -  ७३०                        ४३३
सोनपेठ  - ४५२                       १४५
एकूण  -   ९,७१८                      ५,६५२